Саха сиригэр бастакы онлайн-ыһыах «ыһылынна». «Үһүс саас оскуолата» тэрийэн ыытар «Ньургуһун ыһыаҕа» бырааһынньыкка быйыл коронавирус пандемиятынан сибээстээн уларыйыылар киирдилэр диэн Үлэ министиэристибэтин пресс-сулууспата иһитиннэрэр.
«Пандемия кэмигэр олох тохтоон хаалбат. Биһиги социальнай тэрилтэлэрбит үлэлэрэ салҕанар. Онлайн эрэсиимҥэ мустаммыт, бэйэ-бэйэбитин бырааһынньыгынан эҕэрдэлээтибит. Оробуочай мунньахтары, дьыалабыай кэпсэтиилэри Интэриниэт ситимин нөҥүө ыытарга номнуо үөрэнэн хаалбыппын, оттон маннык Ыһыахха бастакыбын кытынным. Үрдүк таһымнаахтык ааста диэн бэлиэтиэххэ наада. Бу тэрээһин сыллата ыытыллар, быйыл 21-с төгүлүн буолла. Аҕа саастаах көлүөнэ дьоно аныгы технологияны сатыыллара, маннык мусталлара үөрдэр«, — диэн СӨ Үлэҕэ уонна социальнай сайдыыга миниистирэ Елена Волкова «Инстаграм» социальнай ситимҥэ баар страницатыгар кэпсээтэ.
Онлайн-ыһыах алгыс сиэриттэн-туомуттан саҕаланна, онтон култуурунай бырагыраама, наҕараадалааһын ыытылынна. Ситимҥэ мустубут дьону Өрөспүүбүлүкэтээҕи социальнай көрүү-истии комплекснай киинин дириэктэрэ Наталья Пахомова, Дьокуускай куорат баһылыгын социальнай боппуруостарга солбуйааччы Наталья Степанова, Дьокуускай куораттааҕы Дуума бэрэссэдээтэлэ Альберт Семенов, солбуйааччы Евдокия Евсикова, Бэтэрээннэр сэбиэттэрин бэрэссэдээтэлэ Вильям Очиров эҕэрдэлээтилэр.
Онлайн-ыһыаҕы Өрөспүүбүлүкэтээҕи социальнай көрүү-истии комплекснай киин уонна «Үһүс саас оскуолата» тэрийэн ыыттылар. Дьиэҕэ хааччахтанан олорор аҕам саастаах дьон көхтөөхтүк тэрээһиҥҥэ кытыннылар.