Муус устар 13 күнүттэн Саха сиригэр “Онкопоиск” диэн аахсыйа ыытыллыбыта. Манна Ил Дархан Айсен Николаев бэйэтинэн холобур буолан, бачыым быраҕан, аахсыйаны саҕалаабыта.
edersaas.ru
Бастаан биир ыйга диэн болдьохтоох этэ, ол гынан баран, баҕалаах киһи элбэх буолан, бэс ыйын 1 күнүгэр диэри уһаппыттара. Бу кэм устата 60 тыһыынча киһи искэн ыарыыта үөскээбитин быһаарар онкомаркер чинчийиитин аастылар, ол иһигэр 13 тыһыынча киһи өрөспүүбүлүкэтээҕи онкологическай диспансерга бэрэбиэркэлэннэ.
Онкомаркерга бэрэбиэркэни ааспыт 3 тыһыынча киһини искэн үөскээн эрэр диэн сабаҕалаан, өссө дириҥ, кэлим чинчийиигэ ыыттылар диэн доруобуйа харыстабылын министиэристибэтин пресс-сулууспата иһитиннэрэр.
Ол эрээри, суруйалларынан, бу кэмҥэ атын уоргана ыалдьа, иһэлийэ сылдьыбыт киһиэхэ онкомаркерын көрдөрүүтэ үрдүк буолуон сөп. Онон дьиҥнээхтик искэн ыарыылаах дьон бу ахсаантан аҕыйах буолуон сөп.
Искэн ыарыылара эрдэ, 1-кы, 2-с стадияларыгар булулуннахтарына, үчүгэйдик эмтэниллэллэр. Онон “Онкопоиск” аахсыйа элбэх киһи олоҕун быыһаабыт буолуохтаах.
Ыспыраапка
Өрөспүүбүлүкэҕэ сыл аайы 2 тыһыынчаттан тахса саҥа ыалдьыбыт дьону булаллар. Хомойуох иһин, 1,5 тыһыынча кэриҥэ киһи сыллата бу ыарыыттан суорума суолланар. Өрөспүүбүлүкэ үрдүнэн барыта 10-ча тыһыынча кэриҥэ киһи искэн ыарыыларын араас көрүҥүнэн ыалдьар.
Ангелина ВАСИЛЬЕВА, “Саха сирэ” хаһыат, edersaas.ru