Омук оҕолоро бүддьүөт суотугар үөрэнэллэр дуо?
Кыһа - Олох-дьаһах - Сэргэлээх - ҮҺҮ - ЭС - маны аах

Омук оҕолоро бүддьүөт суотугар үөрэнэллэр дуо?

Бу күннэргэ социальнай ситимнэринэн М.К.Аммосов аатынан Хотугулуу-Илиҥҥи федеральнай университекка омук оҕолоро бүддьүөт миэстэтигэр үөрэххэ киирэллэр диэн ис хоһоонноох сурук тарҕанна. Бу төһө оруннааҕый?

edersaas.ru

Социальнай ситимнэринэн хаартыскаҕа түһэрэн ыыппыт эксээмэн биэдэмэстэрэ төһө оруннааҕын итиэннэ кэккэ ыйытыыларга хоруйдары ылаары педагогика билимин дуоктара, бэрэпиэссэр, ХИФУ филологияҕа бакылтыатын “Нуучча тыла омук тылын быһыытынан” хаапыдыра сэбиэдиссэйэ Светлана Петроваттан туоһуластым. Онуоха кини ХИФУ норуоттар икки ардыларынааҕы сибээскэ управлениетын начаалынньыга-проректор Владлен Васильевич Кугунуров бастакытынан, тас дойду устудьуоннара бүддьүөт миэстэтин ылбаттарын, төлөөн үөрэнэллэрин быһаарбытын, иккиһинэн, “Россотрудничество” норуоттар икки ардыларынааҕы бары дойдулары кытта үлэлэһэр федеральнай ааҕыныстыба хас биирдии университекка квота көрөрүн эттэ. Онон ХИФУ бүддьүөккэ миэстэтигэр омук оҕолоро туттарсыбаттарын ыйда.

Иккиһинэн, биһиэхэ тас дойдулартан үлэҕэ уопут атастаһа (стажировка) кэлэллэр. Бу үрдүк үөрэхтэр икки ардыларынааҕы уопут атастаһар соруктаах. Холобур, Кытайтан 5 киһи кэллэҕинэ, биһиги араас бакылтыаттарбытыттан эмиэ биэс устудьуон Кытайга үөрэнэ барар. Сыл аҥаара эбэтэр биир сыл үөрэнэллэр. Маныаха тас дойду устудьуоннара ХИФУ устудьуоннарынан ааҕыллыбаттар. Тоҕо диэтэххэ, бэйэлэрин дойдуларыгар туттарсан үөрэнэ киирбит дьон”, — диэн бэрэпиэссэр чопчулаата.

Тарҕаммыт биэдэмэһи көрбүтүм. Ити оҕолор ХИФУ иһинэн үрдүк үөрэх иннинээҕи уонна профориентация бакылтыатыгар (ФДОП) кэлэн биир сыл бэлэмнэнии салаатыгар үөрэммиттэрэ. Онтон дьэ үөрэххэ туттарсаллар, устудьуон буолаллар. Маҥнай кэлээттэрин кытта нуучча тылыгар билиилэрин таһымын бэрэбиэркэлиир тест толотторобут, онтон бүтэрбиттэрин кэннэ эмиэ хатылыыбыт. Эксээмэн тест быһыытынан барар. Сорудаҕа сүрүннээн кырамаатыканы, этиини сөпкө оҥорууларын, тылы сөптөөх түһүккэ туруоралларын, сыһыарыыны сөпкө тутталларын бэрэбиэркэлиир аналлаах”, — диэн Светлана Максимовна быһаарда.

Онон түмүктээн эттэххэ, социальнай ситимнэринэн тарҕанар испииһэк үөрэххэ туттарсыы испииһэгэ буолбатах, биир сыллааҕы бэлэмнэнии бөлөҕүн ааспыт билиилэрин бэрэбиэркэлиир эксээмэннэрин (тест) түмүгэ уонна тас дойдуттан кэлбит устудьуоннарга тус сыаллаах (целевой) миэстэ көрүллүбэт эбит.

 

Людмила ПОПОВА, “Саха сирэ” хаһыат, edersaas.ru сайт.

Хаартыска – интэриниэттэн.

3
2

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

четырнадцать − 8 =