СӨ Бырабыыталыстыбатын Бэрэссэдээтэлин солбуйааччы Ольга Балабкина бүгүн, от ыйын 11 күнүгэр, өрөспүүбүлүкэтээҕи суһал ыстаап брифинин ыытта.
edersaas.ru
Бүтэһик хонукка өрөспүүбүлүкэ үрдүнэн 47 киһи коронавирустаабыта бэлиэтэммит. Итинтэн 39 киһи — Дьокуускай куоракка, иккилии киһи Мииринэй, Алдан, Нерюнгри улуустарыгар, биирдии киһи Чурапчыга уонна Тааттаҕа ыалдьыбыттара чопчуламмыт.
Ольга Валерьевна этэринэн, уопсайа 8,5 тыһыынча кэриҥэ оҕо сайыҥҥы сынньалаҥын атаара улуустарга тахсыбыттара бэлиэтэммит. Кини сынньана тиийбит оҕолору учуокка туруортарарга төрөппүттэр эмиэ кыһаллыахтаахтарын, болҕомтолоох буолуохтаахтарын эттэ. Тыа сиригэр тахсыбыт оҕолор икки нэдиэлэ устата медиктэр кэтэбиллэригэр сылдьыахтаахтар. Бу сыстыганнаах дьаҥы тарҕаппат аналлаах миэрэлэртэн биирдэстэрэ буолар.
Бүгүҥҥү күн туругунан, коронавирустаабыттары сытыарар миэстэлэр 48% туолан тураллар. Ыарыы элбээбэтэҕинэ, от ыйын 15 күнүттэн, өрөспүүбүлүкэҕэ үлэлиир обсерватордар үксүлэрэ сабыллыахтаахтар. Арай, Дьокуускайдааҕы индустриальнай-педагогическай кэллиэскэ тэриллибит обсерватор үлэлии хаалыахтаах.
Түмүккэ, Ольга Балабкина Саха сирин олохтоохторун өрөбүллэрин чугас эрэ дьоннорун кытары атааралларыгар, улахан кыһалҕа суох буоллаҕына, элбэх дьону кытары алтыһа сатаабаттарыгар сүбэлээтэ.
Егор Карпов, «Саха сирэ» хаһыат, edersaas.ru