Ольга Балабкина: «Суһал көмөҕө», арыт, 300-тэн тахса ыҥырыы оҥоһуллар»

СӨ Бырабыыталыстыбатын Бэрэссэдээтэлин солбуйааччы Ольга Балабкина бүгүн, от ыйын 7 күнүгэр, брифиҥҥэ коронавирус балаһыанньатын билиһиннэрдэ.

edersaas.ru

Онно этиллибитинэн, бүгүн күҥҥэ өрөспүүбүлүкэ үрдүнэн коронавируска 4550 киһи сутуллубута  бэлиэтэнэр. Ааспыт сууккаҕа 46 киһи дьаҥҥа ылларбыт. Олортон үгүстэрэ дьокуускайдар. 37 киһи Дьокуускай олохтооҕо. Тоҕус ыарыһах, өрөспүүбүлүкэ атын улуустарыгар бэлиэтэммит. Алдан улууһун Хатыыстыыр нэһилиэгэр кэлии киһиттэн үс олохтоох сутуллубут. Мэҥэ Хаҥалас уонна Мииринэй оройуоннарыгар иккилии киһи ыалдьыбыт, атын улуустарга биирдиилээн. Ааспыт хонукка 170 киһи эмтэнэн үтүөрбүт.

Балабкина саастаахтары уонна дьарҕарбыт ыарыылаах дьону сэрэхтээх буолуҥ диэн этэр.

— 65-тэн үөһээ саастаахтар уонна дьарҕарбыт ыарыылаахтар эрэсиим чэпчэтиитин үһүс түһүмэҕин да кэнниттэн, бэйэни хааччахтаныы эрэсиимин тутуһуох тустаахтар. Кинилэрнэ дьаҥ олус кутталлаах. Өрөспүүбүлүкэҕэ аҕам саастаах дьоммутун, эбээлэрбитин, эһээлэрбитин коронавирустан харыстыыр сорук турар. 

«Суһал көмө» үлэтигэр нэһилиэнньэ киллэрэр үҥсүүлэригэр, Ольга Валерьевна брифинг түмүгэр тохтоон ылла:

— Кэнники кэмҥэ “суһал көмөнү» ыҥырбыппытыгар кэлбэтилэр», «анаалыс ылартан аккаастаннылар” диэн элбэх киһи үҥсэр буолла. Өрөспүүбүлүкэ ыстааба “суһал көмө” массыыналарын үлэтин кэтээн көрөр. Сорох күннэргэ, арыт, “суһал көмөнү” 300-тэн тахсата ыҥыраллара бэлиэтэнэр. «Суһал көмө» үлэһиттэрэ бигэргэтиллибит алгоритмынан, сөптөөх үлэни ыыталлар. 

Егор Карпов, «Саха сирэ» хаһыат, edersaas.ru