Өрөспүүбүлүкэ суһал ыстаабын салайааччытын солбуйааччы Ольга Балабкина киэһээҥҥи брифини харантыын миэрэлэрин сымнатыыга анаата, кыһалҕаларга болҕомтотун уурда.
edersaas.ru
— Парикмахерскайдар уонна салоннар саҥа ылыллыбыт быраабылалары толороллоро уустук. Ол да буоллар, ирдэбиллэр, быраабылалар хайаан даҕаны тутуһуллуохтаахтар. Эрдэ сурутуу эрэ буолбакка, Роспотребнадзор ирдэбиллэрин барытын олоччу тутуһуохтаахтар. Мантан ыла, дьаҥтан сылтахтанан киллэриллибит уларыйыыларга сөп түбэһэн олоруохтаахпытын, үлэлиэхтээхпитин өйдүөх тустаахпыт.
Ордук уустук балаһыанньаны дьоннор олорор дьиэлэрин маҥнайгы мэндиэмэннэригэр баар маҕаһыыннар, тэрилтэлэр көрүстүлэр. Кинилэр бэс ыйын 15 күнүттэн үлэлиэхтэрин сөп эрээри, саҥа быраабылалар олус кытаанах ирдэбиллэригэр сөп түбэһэн үлэлииллэрэ уустугурбут. Холобур, биир атыылаһааччыга хайаан даҕаны 4 кв.м. иэннээх сир баар буолуохтаах.
Дьокуускай куоракка бэйэни хааччахтаныы эрэсиимэ бэс ыйын 21 күнүгэр диэри уһатыллыбыта. Ол гынан баран, бу нэдиэлэҕэ ыарыы намтаатаҕына, бэс ыйын 22 күнүттэн харантыын эрэсиимин чэпчэтии иккис түһүмэҕэ саҕаланыаҕа диир Ольга Валерьевна.
Егор Карпов, «Саха сирэ» хаһыат, edersaas.ru