Ольга Балабкина: «Коронавируска күннэтэ 2500-3000 анаалыс оҥоһуллар»
СӨ бырабыыталыстыбатын бэрэссэдээтэлин солбуйааччы Ольга Балабкина, от ыйын 25 күнүгэр Суһал ыстаап брифинин сарсыарда 11 чааска ыытта.
edersaas.ru
Бу субуотаҕа бигэргэммит тиһэх чахчылар көрдөрөллөрүнэн ааспыт сууккаҕа өрөспүүбүлүкэ үрдүнэн саҥа коронавируска сыстыы 50 түгэнэ бэлиэтэммит. Олортон Дьокуускай куоракка 42 киһи ыалдьыбыт, үстүү киһи Алдаҥҥа уонна Нерюнгрига уонна икки киһи Ленскэй улууһугар сутуллубуттара биллибит. Бэҕэһээ COVID-19 диагностаах икки иһи тыына быстыбыт.
Саха сирин лабораторияларыгар ааспыт күн 2718 коронавируска тест оҥоһуллубут. Ольга Валерьевна этэринэн, күннэтэ 2500-3000 анаалыс булгуччу оҥоһулла турар, бу ахсаан өрөспүүбүлүкэ үрдүнэн ыарыы туругун сөпкө анаалыстыырга көмөлөһөр.
Мэдэссиинэ тэрилтэлэрэ ыытар кэтээн көрүүлэрин түмүгүнэн, ыалдьыбыттар ахсааннарыттан 75% тахса киһи 65 саастарын ситэ илик эдэр дьон эбиттэр. “Бу сыыппара аҕа саастаах дьоммут биллэриллибит сэрэтиигэ эппиэтинэстээхтик сыһыаннаһан, бэйэни хааччахтаныыны тутуһалларын көрдөрөр. Кинилэргэ биһиги махтаныах тустаахпыт” — диэн Ольга Балабкина бэлиэтээн эттэ.
— Бүгүн күҥҥэ ордук тоһоҕолоон биири этиэхпин баҕарабын — биһиги бары бу күннэргэ биир талыы иннитигэр турабыт. Дьиҥэр, бу талыы ким эрэ коронавируска итэҕэйэригэр, итэҕэйбэтигэр сыһыана суох. Талыы — доруобай буоларга эбэтэр ыалдьарга, чугас дьону, атын дьону сутуйарга сытар. Ол иһин, бу күннэргэ дьону мунньан үбүлүөй тэрийэр дьон, эбэтэр атын төрөппүттэргэ “коронавируска итэҕэйбэппин, выпускнойда оҕолорго тэрийиэҕин!” диир дьон, бу талыы туһунан толкуйдуох тустаахтар.
Егор Карпов, «Саха сирэ» хаһыат, edersaas.ru