Ольга Балабкина: «Алдаҥҥа 24 киһи коронавируска сутуллубута бигэргэннэ»

Ааптар: 
Бөлөххө киир:

СӨ бырабыыталыстыбатын бэрэссэдээтэлин солбуйааччы Ольга Балабкина, от ыйын 15 күнүгэр Суһал ыстаап брифинин сарсыарда 11 чааска ыытта.

edersaas.ru

Бу күҥҥэ биллэр тиһэх чахчыларынан ааспыт хонукка өрөспүүбүлүкэ үрдүнэн 72 киһи  коронавируска сыстыы түгэннэрэ бэлиэтэммиттэр.

Дьокуускай куоракка ыарыы тэтимэ сүнньүнэн уларыйбатах — ааспыт хонукка 35 киһи саҥа дьаҥҥа ылларбыт. Ол оннугар Алдан оройуонугар ыарыы биир сиргэ күөдьүйбүтэ бигэргэммит. Томмот психоневрологическай диспансерыгар 24 киһи коронавируһунан ыалдьыбыта биллибит. Бары ыарыһахтар быраастар кэтэбиллэригэр сылдьаллар. Ленскэйгэ уонна Мииринэйгэ түөртүү саҥа ыарыһах эбиллибит, Таатта улууһугар икки киһи ыалдьыбыт, уонна биирдиилээн киһи Үөһээ Дьааҥыга, Чурапчыга уонна Нерюнгрига коронавируһунан сутуллубуттара билиннэ. Балыыһаттан  үтүөрэн 115 киһи тахсыбыт. Ааспыт күҥҥэ икки ыарахан ыарыһах COVID-19 ыарыыттан тыыннара быстыбыт. Күн аайы 2,5 тыһыынча кэриҥэ коронавируска анаалыс оҥоһулла турар.

Ольга Валерьевна Саха сиригэр коронавирус инфекцията тарҕаныытын сэрэтэр хааччахтааһын миэрэлэрэ от ыйын 24 күнүгэр диэри уһатыллыбыттарын бигэргэттэ. Ол аата маасканы кэтии булгуччулаах миэрэ быһыытынан хаалар. Успуорт уонна атын күргүөм тэрээһиннэр өссө даҕаны ыытыллаллара көҥүллэммэт. 65 саастарыттан үрдүк саастаахтар уонна хроническай ыарыылаахтар бэйэни хааччахтаныы эрэсиимин тутуһуох тустаахтар. Ольга Балабкина бу категорияҕа киирсэр дьоҥҥо эрэсиим кытаанах услуобуйаларын толорон, быраастар үлэлэригэр көмөлөһөллөрүн иһин, махталын тиэртэ.

Ольга Балабкина  биир түгэни тоһоҕолоон эттэ:

Бүгүн Саха сиригэр кэлэр дьон ахсааныттан 14 хонуктаах харантыыҥҥа баахтанан үлэлии кэлэр эрэ дьон киирэллэр. Саха сирин олохтоохторо уонна атын ыалдьыттара булгуччулаах харантыыҥҥа аны угуллубаттар. Ол эрэн, тас сирдэртэн ыарыы кэлиитэ төһө даҕаны намтаатар, олох суох буолла диир сатаммат. Онон бука диэн алтыһар дьоҥҥут эргимтэтин улаатыннарбакка, чугас дьоҥҥутун эрэ кытта сылдьа сатаан.

Егор Карпов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0