Саҥа дьылга ыраах Оленегорскайга “Айтун” этно-култуурунай кииҥҥэ “Мааска” тыйаатыр-куруһуок “Аныгы Дюймовочка” сыанкалары туруорда. Бу туруорууга Дюймовочка оруолун Василина Голикова, кроту Петя Протодьяконов оонньоотулар. Маны тэҥэ Яна Слепцова, Алеша Слепцов, Алеша Горохов, Дуня Сыромятникова уо.д.а. оонньообуттарын олохтоохтор олус сэргээтилэр. Онон олохтоох артыыстар Саҥа дьыллааҕы үөрүүнү бэлэхтээтилэр.
Оттон Оҕо искусствотын үөрэнээччилэрэ “Түөрт кутуйах” диэн туруорууну көрдөрдүлэр. Хоту дойду нэһилиэгин оҕолоругар өссө үөрүүнү “Янзолото” ХЭУо бэлэхтээтэ. Генеральнай директор Иван Николаевич Ребров салалтатынан 78 саҥа дьыллааҕы бэлэҕи ыыттылар. Ону тэҥэ бөһүөлэк оҕолорун утреннигар “Биир ньыгыл Арассыыйа” баартыйа чилиэнэ, Аллайыахатааҕы оройуон сэбиэтин дьокутаата Щелканова Любовь Дмитриевна спонсордаата. Щелкановтар-Стрюковтар дьиэ кэргэн үлэ уонна тыыл бэтэрээнэ, Оленегорскай бочуоттаах гражданина Щелканова А.Г. аатын үйэтитэр сыалтан, сыл аайы Саҥа дьыллааҕы оҕо утреннигар спонсордаан, көмөлөһөргө быһаарыммыттара.
Олохтоохтору Саҥа дьыл уһун өрөбүллэригэр сэргэхситэр биир түгэнинэн “Хаарчаана – 2020” куонкурус буолла. Полина Горохованы уонна Айсена Перевозчикованы кыайыыларынан эҕэрдэлээтилэр. Маны тэҥэ “Сыл бэлиэтэ” уонна “Бастыҥ снежинка” диэн оҥоһуктар куонкурустарыгар Лира Горохова уонна Софья Трофимова, Жанна Трофимова, Катя Суздалова бастыҥынан ааттаннылар. “Саамай талааннаах” номинацияны Анна Трофимова ылла.
Бу курдук Саҥа дьыл бырааһынньыга Оленегорскай олохтоохторугар (баһылык В.И.Трофимова) үөрүүнү-көтүүнү, өрө көтөҕүллүүнү бэлэхтээтэ.
Женни Стрюкова.
Хаартыскалары олохтоох дьаһалта ыытта.