Оскуолаҕа киириэн иннинээҕи уонна оскуола саастаах оҕолорго Улуу Кыайыы 75 сылынан өрөспүүбүлүкэтээҕи күөн күрэс ыытыллыбыт.
Коронавирус дьаҥынан, ыраахтан олорон күрэстэһиигэ барыта 50 оҕо кыттыыны ылбыт. Күөн күрэһи көҕүлээбит, тэрийбит Таатта улууһун Дьохсоҕон нэһилиэгин «Мичил» оҕону сайыннарар киин уһуйааччыта, «Айар сулус» арт-студия тэрийээччитэ уонна салайааччыта Лариса Попованы кытары кэпсэттим.
— Бииргэ төрөөбүт бырааппын Анатолий Попову кытары Улуу Кыайыы 75 сылынан күрэс тэрийиэххэ диэн толкуйдаабыппыт. Биһиги былааммытын нэһилиэкпит баһылыга Петр Егорович Захаров уонна Алампа Софронов аатынан норуот айымньытын дьиэтин дириэктэрэ Изабелла Семеновна Жараева өйөөтүлэр. Кинилэргэ махталбыт улахан.
Тэрийбит сыалбыт-сорукпут: бастатан туран, Ийэ дойду устуоруйатын оҕолор билэ-көрө улааталларыгар уурулунна. Иккиһинэн, коронавирус дьаҥын бохсон дьиэҕэ хааччахтанан олоруу кэмигэр, оҕолор туһалааҕынан дьарыктаналларын, билиилэрин-көрүүлэрин хаҥатыналларын ситиһии.
Күрэскэ Ньурбаттан, Бүлүүттэн, Томпоттон, Мэҥэ Хаҥаластан, Чурапчыттан, Тааттаттан, Дьокуускайтан көхтөөхтүк кытыннылар, — диэн кэпсээтэ.
Куонкурустаһааччылар «Аҕа дойду сэриитэ» түһүмэххэ байыаннай макеты кэпсээбиттэр. «Кыайыы өрөгөйө» түһүмэххэ Кыайыы 75 сылынан видеонан эҕэрдэлэрин эппиттэр. «Албан ааттар» түһүмэххэ тыылга үлэлээбит, уоттаах сэриигэ кыттыбыт, сэрии сылларын оҕолорун туһунан видеосюжеттарынан кыттыбыттар.
Күрэс кыттыылаахтара саастарынан тус-туһунан бөлөхтөргө араарыллыбыттар. Ол курдук, 1 сүһүөххэ оскуолаҕа киириэн иннинээҕи саастаах кырачааннар, 2-с сүһүөххэ 1-4 кылаас оҕолоро, 3-с сүһүөххэ 5-8 кылаас үөрэнээччилэрэ уонна 4-с сүһүөххэ 9-11 кылаастар.
Түһүмэхтэргэ уонтан тахсалыы оҕо кыттыбыт. Киирбит үлэлэри нэһилиэк баһылыга П.Е.Захаров салалталаах дьүүллүүр сүбэ болҕомтолоохтук көрбүт-истибит, сыаналаабыт. Оҕолор үлэлэрин көрүүгэ А.Софронов норуот айымньытын дьиэтин дириэктэрэ И.С.Жараева, дириэктэри солбуйааччы А.В.Константинова, нэһилиэк бибилэтиэкэтин сэбиэдиссэйэ Г.Н.Другина, саха тылын, литературатын учуутала Г.К.Давыдова күөн күрэскэ киллэриллибит үлэлэри сыаналаабыттар. Хас көрүҥ ахсын 1,2,3 миэстэлэр быһаарыллыбыттар. Инстаграмынан куоластааһынынан, «Куоластааһын кыайыылааҕа» диэн анал ааттар анаммытар.
Лариса Анатольевна бары кыттыбыт оҕолорго уонна кинилэри бэлэмнээбит салайааччыларыгар махтанар. «Ис сүрэхтэриттэн кыһаллан, улахан болҕомтолорун ууран бэлэмнэммиттэрэ барыбыт сүргэбитин улаханнык көтөхтө», — диир кини. Күөн күрэс үрдүк таһымнаахтык барбыт. Оттон кыттааччылар маннык күрэхтэһии оҕолорго кэлэр да өртүгэр ыытылларыгар баҕарбыттар.
Сардаана Баснаева, «Саха сирэ» хаһыат, edersaas.ru
Хаартыскалар «Айар сулус» арт-студияттан