Бу күннэргэ Дьокуускайга буола турар Ойуур национальнай форумун чэрчитинэн, өрөбүлгэ, бэс ыйын 2 күнүгэр Санкт Петербурдааҕы аан дойду таһымыгар үлэлиир табаар уонна сырье биржата хайдах үлэлиирин билиһиннэрдилэр. Боростуойдук быһаардахха, бу биржаҕа ньиэп, гаас бородууксуйатын, уматыгы, бэнсиини, ойуур хаһаайыстыбатын матырыйаалын, минеральнай уоҕурдууну кууһунан атыылыыллар уонна атыылаһаллар.
edersaas.ru
Биржа (СПБМТСБ) 2008 сыллаахха дойду аҕа баһылыга Владимир Путин көҕүлээһининэн тэриллибитэ. 2018 сыл түмүгүнэн, 19,97 мөлүйүөн туонна бэнсиин, дизель, авиакеросин, мазут о.д.а. биржа нөҥүө атыыга тахсыбыт, 15,1 миллиард куб гаас батарыллыбыт.
Алексей Рыжиков, СПБМТСБ салайар дириэктэрэ Уһук Илин сорох эрэгийиэннэр биржаны тумнан туран, кистээн биллибэтинэн-көстүбэтинэн ойуур маһын Кытайга атыылыылларын, ол түмүгэр судаарыстыба хааһынатыгар нолуок төлөммөтүн, биирдиилээн дьон сиэптэрин хаҥаталларын аҕынна. Билиҥҥи туругунан, дойду үрдүнэн ойуур маһын саамай улахан кээмэйин Красноярскай кыраай, Забайкалье, Иркутскай уобалас биэрэллэр. Онон ньиэп-гаас, ойуур маһын атыылааһын хайаан да ити биржа нөҥүө оҥоһуллуохтааҕын бэлиэтээтэ.
«СПБМТСБ биржатыгар аныгы технологиянан электроннай атыы-эргиэн тэрийэбит, ол хаамыытын онлайн көрө олоруохха сөп. Эрдэттэн биир тэрилтэ интэриэһин өрө туппаттарын туһугар контрагеннар кимтэн табаар атыылаһалларын билбэттэр. Анонимнай аукцион ыытыллар. Клиринг хайысхатынан табаар аадырыска тиксэриллибитин кэннэ биирдэ харчы төлөнөр», — диэн быһаарда Илья Альков, СПБМТСБ пресс-сулууспатын салайааччыта.
Сахабыт сирэ бу биржаттан эмиэ миллиардынан суумаҕа уматыгы, бэнсиини кууһунан атыылаһар эбит.
Марианна Тыртыкова, «Саха сирэ», edersaas.ru