Хотугу улуустарга ойуур баһаарын төрүөтүн саха учуонайа сиһилии быһаарда.
edersaas.ru
Хотугулуу-Илиҥҥи университет наукаҕа уонна инновацияҕа проректора Юрий Данилов бу үөрэх кыһатын пресc-сулууспатыгар Саха сирин хотугу улуустарыгар буола турар баһаардар төрүөттэрин быһаарда.
Учуонай бэлиэтииринэн, ойуур баһаардара аллараанан уонна үөһэнэн барар баһаардар диэҥҥэ арахсаллар.
— Тиит мастаах ойуур чөлүгэр түһэригэр баһаар хайаан да барыахтаах. Онно тыа аллараа почвата умайар буоллаҕына, куттал суоһаабат. Оттон уот маһы сиир гына барар буоллаҕына, айылҕаҕа улахан охсуулаах: кыыл-сүөл, көтөр эстэр, үүнээйи өлөр, кэхтэр, үөн-көйүүр симэлийэр.
Хотугу улуустарга бара турар ойуур баһаара — килиимэт уларыйыытын кытта ыкса сибээстээх. Сылыйыы барда. Кыһына ичигэс, сайын ураты куйаас, сөҥүү түспэт. Саас уу сиргэ иҥмэккэ, устан, көтөн хаалар. Бу кыһына ичигэс буолан маннык. Итиини муох тутар. Өскө ойуур баһаарыттан сылтаан, муох сүтэн хааллаҕына, сир анныгар сытар ирбэт тоҥ улаханнык ирэн барар куттала баар. Ойуур бэйэтин күлүгүнэн ирбэт тоҥу куйаас салгынтан харыстаан турар. Онон хотугу улуустарга буола турар баһаар ойууру имири эстэҕинэ, сир анна түргэнник ириэҕэ, — диэн санаатын тиэртэ Юрий Данилов.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа — Өймөкөөн улууһун Төрүт нэһилиэгин сиригэр-уотугар үөһэнэн бара турар баһаар.