Өрөспүүбүлүкэҕэ атырдьах ыйын 7 күнүгэр 916 543,6 гектарга 116 ойуур баһаара бэлиэтэммит. Биһиги Сунтаар улууһун баһылыгын 1 солбуйааччытыттан Николай Александровтан балаһыанньа хайдаҕын ыйыталастыбыт.
— Күн бүгүн ойуур баһаардара нэһилиэктэргэ кутталы үөскэппэттэр, үксүн сэрэтэр үлэ ыытыллар. Анал тиэхиньикэни таһарга нэһилиэнньэттэн баҕалаах дьон кэлэн көмөлөһөр. Өскөтүн уот чугаһаатаҕына, эрдэттэн нэһилиэнньэлээх пууннары көмүскүүргэ бэлэм олоробут.
Ыраах турбут ойуур баһаардарын иэнэ улаатарынан уонна нэһилиэктэргэ кутталы үөскэтэринэн сибээстээн, Сунтаар улууһугар ыксаллаах быһыы-майгы биллэриллибитэ.
Ойуур баһаара суола-ииһэ суох ыраах тайҕа быыһыгар турар, ол иһин бадараантан, дулҕалаах маардартан иҥнибэккэ иннин хоту барар бульдозердары туттабыт.
Хабаровскайтан кэлбит БЕ-200 сөмөлүөт үөһэттэн уу куппутун кэннэ саамай ыарахан — илии үлэтэ саҕаланар. Нэһилиэктэргэ куттал үөскээбэтин туһугар ойуур баһаардарын хонтуруоллуу олоробут, — диэн билиһиннэрдэ кини.
Марианна Тыртыкова, «Саха сирэ» хаһыат, edersaas.ru