Саха сиригэр 19 сиринэн ойуур баһаара бара турар, онтон уона бохсулунна диэн СӨ Экология, айылҕаны туһаныы уонна ойуур хаһаайыстыбатын министиэристибэтин пресс-сулууспата иһитиннэрэр.
Уот уопсайа 549,80 га иэннээх сири ылбыт. Ол курдук, Дьааҥыга түөрт, Намҥа үс, Мэҥэ Хаҥаласка, Томпоҕо, Чурапчыга иккилии, Ленскэйгэ, Нерюнгрига, Горнайга, Кэбээйигэ, Мииринэйгэ уонна Муомаҕа биирдии баһаары умуллара сылдьаллар.
Ааспыт сууккаҕа Үөһээ Бүлүүгэ, Горнайга, Тааттаҕа, Уус Алдаҥҥа уонна Хаҥаласка алта ойуур баһаара турбута бохсулунна. Миэстэтигэр 454 киһи, 33 тиэхиньикэ үлэлээтэ.
Өрөспүүбүлүкэ олохтоохторун уонна ыалдьыттарын, бөһүөлэк, бэйэ тиэргэнин иһигэр итиэннэ тыаҕа баһаартан сэрэхтээх буолуу быраабылаларын кыраҕытык тутуһаргытыгар, муҥутуур сэрэхтээх буоларгытыгар итиэннэ уот туран эрэрин көрдүгүт да эрэгийиэннээҕи диспетчерскэй сулууспаҕа (8-4112-44-74-76) эбэтэр ойуур харыстабылын суһал линиятыгар (8-800-100-94-00) биллэриҥ диэн Экология, айылҕаны туһаныы уонна ойуур хаһаайыстыбатын министиэристибэтэ иһитиннэрэр.
edersaas.ru