Госдуума ЛДПР баартыйаттан дьокутаата Василий Власов коронавирус карантинын кэмигэр нэһилиэнньэни ОДьКХ төлөбүрүттэн босхолуурга РФ Тутууга министиэристибэтин көрүүтүгэр тус этиитин ыытта.
Коронавирус кэмигэр дьон дохуотун сүтэрэр, дьиэҕэ олорон уокка онтон да атын хомунаалынай өҥөҕө ороскуота үрдүүр, онон маннык ыарахан кэмҥэ ОДьКХ төлөбүрүттэн быстах кэмҥэ босхолуур оруннаах диэн быһаарбыт кини.
Ил Түмэн бүддьүөккэ, үпкэ-харчыга, нолуокка уонна сыана бэлиитикэтигэр, бас билиигэ, приватизацияҕа бастайааннай кэмитиэт бэрэссэдээтэлэ Юрий Николаев: «Мин санаабар, ОДьКХ төлөбүрүн уһатан биэрии популизм, карантин ааспытын кэннэ син биир хас да ыйдаах иэскин төлүөххүн наада. Ол оннугар хомунаалынай сулууспа үлэһиттэригэр эбии субсидия көрүллэрэ буоллар. Оччоҕуна кинилэр кырдьык дьиҥнээх көмөҕө наадыйар дьоҥҥо чэпчэтии оҥоруо этилэр», — диэн санаатын үллэстэр.
Марианна Тыртыкова, «Саха сирэ», edersaas.ru