Өрөспүүбүлүкэ Ил Дархана Айсен Николаев Кытайы кытары кыраныыссаны сабыынан сибээстээн, фрукта, оҕуруот астарыгар сыанаҕа мониторины ыытарга сорудахтаата.
edersaas.ru
«Биһиэхэ үүнээйи төрүттээх кэккэ бородуукталарга сыана икки төгүл үрдэтиллибитин туһунан иһитиннэриилэр киирэллэр. Ити билигин оҕуруот астара уонна фрукталар Новосибирскайтан эбэтэр Москваттан аҕалыллалларын кытта сибээстээх (урут Кытайтан аҕалаллара). Ол да буоллар, биирдиилээн уонна кууһунан атыылааһын сыанана үрдүүрүн тохтоторго дьаһаллар былааннара ылылынна”, — диэн Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Денис Белозеров суруналыыстары кытары көрсүһүүгэ иһитиннэрдэ. Олохтоох бэйэни салайыныы уорганнара биирдиилээн уонна кууһунан атыы сыаналарыгар эргиэн надбавкаларын эрэ олохтуур бырааптаахтарын санатта.
Куорат уонна өрөспүүбүлүкэ улуустарын ырыынактарыгар сыананы үрдэппэттэрин туһугар Саха сирин судаарыстыбаннай тэрилтэлэрэ бородууктаны аҕаларга тардыллыахтара. Күҥҥэ биир туонна бородууктаны биэрэр “Саюри” сылы быһа үлэлиир тэпилиссииэ бородууксуйатыгар сыана эмиэ үрдүө суоҕа. Өрөспүүбүлүкэҕэ оҕуруот аһын уонна фрукта сыаналарыгар мониторинг тиһигин быспакка ыытыллыаҕа, рейдэлэр оҥоһуллуохтара.
Надежда ЕГОРОВА, “Саха сирэ”, edersaas.ru
Мария ВАСИЛЬЕВА түһэриилэрэ