Оҕону бэйэни тиийиниигэ угуйуу иһин холуобунай эппиэтинэс күүтэр

Ааптар: 
Бөлөххө киир:

Биллэрин курдук, билиҥҥи кэмҥэ өйө-санаата ситэ илик, уйулҕата бөҕөргүү илик обургу оҕону ол-бу куһаҕаҥҥа кучуйар, мөкүгэ угуйар, иэдээҥҥэ тиэрдэр араас барыта баар. Холобур, социальнай ситимнэргэ ордууламмыт «өлүү бөлөхтөрө». Бигэ тирэҕэ, чугас дьонуттан күттүөннээх өйөбүлэ суох оҕо оннукка дэбигис түбэһэр.

edersaas.ru


Дьокуускай куорат борокуратууратын пресс-сулууспата биһиги сайтпытыгар иһитиннэрбитинэн, бу дьыл бэс ыйын 7 күнүттэн 120 №-дээх федеральнай сокуонунан РФ Холуобунай уонна Холуобунай-процессуальнай кодексаларыгар уларыйыылар киирбиттэр.

Чуолаан, Холуобунай кодекс 110-с ыстатыйата, ол эбэтэр, «Бэйэҕэ тиийиниигэ тиэрдии» ыстатыйата, уларыйбыт.

Ол курдук, киһиэхэ кырыктаахтык сыһыаннаһан, киһи дьоһунун түһэрэн, саанан туран, бэйэтигэр тиийиниигэ тиэрдиигэ суудайыы биитэр тиэрдии иһин эппиэтинэс кытааппыт. 

Бу ыстатыйаҕа өссө 2-с чаас эбиллибит, ол — ити дьайыылар сокуоннай сааһын ситэ илик оҕоҕо, хат дьахтарга, хас да киһиэхэ туһуланан оҥоһуллубут буоллахтарына, сокуон иннигэр эппиэтинэс эмиэ улаатар. Өскөтүн ити дьайыылары бөлөҕүнэн, сонуннары киэҥник тарҕатар ситимнэргэ, интэриниэккэ, дьон иннигэр тыл этиигэ («публичнай») оҥорбут буоллахтарына.

Маны таһынан, бэйэҕэ тиийиниигэ угуйуу биитэр «көмөлөһүү» иһин (РФ ХК 110.1-с ыст.), бэйэҕэ тиийиниэн баҕарарын курдук оҥоруу, тэрийии иһин (РФ ХК 110.2-с ыст.), сокуоннай сааһын ситэ илик оҕону кини олоҕор кутталлаах дьайыылары оҥороругар кучуйуу иһин (РФ ХК 151.2-с ыст.)холуобунай эппиэтинэс олохтонно.

Борокуратуура бу киирбит уларыйыылар обургу оҕолор бэйэҕэ тиийиниилэрин утары охсуһууга, сэрэтиигэ сыһыаннаахтарын бэлиэтиир.

Ол эбэтэр, «өлүү бөлөхтөрүн» администратордара итиэннэ бэйэҕэ тиийиниини тэрийээччилэр эппиэтинэстэрин туһунан этиллэр.

Оттон «сокуоннай сааһын ситэ илик оҕону кини олоҕор кутталлаах дьайыылары оҥороругар кучуйуу иһин» диэҥҥэ «зацепинг» (тырааныспарга ыттыы, тутуһуу), «руфинг» (үрдүккэ ыттыы, дьаарбайыы), «Беги или умри» диэҥҥэ хабааннаах оонньуулар киирэллэр.

Бу бэс ыйын саҥатыгар Москва куоракка «өлүү бөлөҕүн» тэрийиигэ уорбаланар 26 саастаах киһини туппуттарын истибит-көрбүт буолуохтааххыт. Кинини сокуоннай сааһын ситэ илик кыыһы бэйэтигэр тиийиниитигэр тиэрдиигэ буруйдууллар.

Бу киһийдэх билиммитинэн, кини тэрийбит бөлөҕөр 32 оҕо баар эбит. Бу оҕолорго кини бэйэлэрин доруобуйаларын айгыратар сорудахтары биэрэр, ол кэнниттэн бэйэлэригэр тиийинэллэригэр тиэрдэр дьарыктаах эбит.

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0