Оҕолору умсугутар лааҕыр
Олох-дьаһах

Оҕолору умсугутар лааҕыр

Билигин оҕо сайыҥҥы сынньалаҥын тэрийии үгэннээн турар кэмэ. Аныгы кэмҥэ төрөппүт харчылаах эрэ буолуон наада, оҕотун ханна баҕарар ыытан сынньатар, сайыннарар кыахтаах. Өрөспүүбүлүкэҕэ киэҥник биллэр судаарыстыбаннай лааҕырдар үгүстэр. Олортон биирдэстэринэн  Амматааҕы Эдэр натуралистар ыстаансыйалара буолар.

edersaas.ru

Амматааҕы Эдэр натуралистар ыстаансыйалара тэриллибитэ быданнаата. Улууска, өрөспүүбүлүкэҕэ бастыырын таһынан, Арассыыйаҕа тиийэ миэстэлээх. Биир сезоҥҥа 45 оҕону хабан, икки хайысханан үлэлииллэр. Үөрэтэр соруктаах кыра кылаастарга аналлаах “Эко-Амма”, орто, улахан сүһүөх кылаастарыгар үлэ хайысхалаах Эдэр натуралистар ыстаансыйалара бааллар. Сезон 21 күннээх. Хортуоппуй, оҕурсу, помидор, хаппыыста, сүбүөкүлэ, моркуоп ыһаллар, кэлин малинаны, моонньоҕону, о.д.а. олордон эрэллэр эбит.

Лааҕырбыт – күнүскү. Атын лааҕырдартан уратыбыт диэн, бастатан туран, сезон устата оҕолор үүнээйи олордон, үүннэрэн, батаран, онтон киирбит харчынан кыра да буоллар, хамнас аахсаллар. Илии баттаан хамнас ылалларыттан — кинилэр саҕа дьоллоох дьон суох. Уһун уочарат буолар. Иккиһинэн, оҕону тулуурга, үлэҕэ үөрэтэбит. Итиигэ буһаллар-хаталлар, кумаарга да сиэтэллэр. Уһаабыта сэттэлии сыл сылдьыбыт оҕолордоохпут. Аныгы оҕо үлэттэн тэйдэ дииллэрэ оруннаах. Билигин, урукку курдук, үлэ лааҕыра аҕыйах. Ол иһин, сорох төрөппүттэр итини таба өйдөөн, анаан-минээн аҕалаллар. Үсүһүнэн, ландшафтнай дизайнынан дьарыктаналлар. Интэриниэт ситимиттэн көрөн үөрэнэн, сөптөөҕүн талан, араас фигуралары, үүнээйини кытта дьүөрэлээн киэргэтэбит. Саадпытыгар мас араас көрүҥүн олордобут, — диэн дириэктэр Дмитрий Матвеев кэпсиир.

Инникитин былааннара үгүс. Ол курдук, кыра да буоллар анал тэрил ылан, чэй оҥорор санаалаахтар. Былырыын бэлэххэ аналлаах “Амма чэй” диэн ааттаан, дьэдьэннээх, чэйдээх, чааскылаах набор оҥорон атыылаабыттар. Быйыл Аммаҕа ыытыллар СӨ Норуоттарын спортивнай оонньууларыгар итини сөргүтэр соруктаахтар. Ону таһынан, эмтээх оттору хомуйуунан дьарыктанар толкуйдаахтар. Итиэннэ сүрүн дьарыктарын – оҕуруот аһын, сибэкки олордуутун, ландшафтнай дизайны ыһыктыбаттар. Оҕуруот аһын арассаадатын барытын батарбыттар, бу күннэргэ отонноох уонна талах, мас үүнээйилэри атыыга таһаарарга бэлэмнэнэллэр. Быйыл сэлиэнньэни көҕөрдүүгэ 20 тыһыынча арассаадаҕа сакаас ылан олороллор, онтон нэһилиэги киэргэтиигэ лааҕыр исписэлиистэрэ ылсыахтаахтар эбит.

 

Людмила ПОПОВА, “Саха сирэ” хаһыат, edersaas.ru

 

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

шестнадцать + тринадцать =