Оҕолор эрдэ үөрэнэн бүтүөхтэрэ дуо?

Ааптар: 
Бөлөххө киир:

Дойду Үөрэҕириигэ министиэристибэтэ бэҕэһээ эрэгийиэннэргэ сүбэлиир суруктары ыыталаабыта. Бүгүн социальнай ситимнэргэ кэпсэтии ол эрэ туһунан.

edersaas.ru

Дойду эрэгийиэннэргэ ыыппыт оскуолаларга сыһыаннаах суругун бу сигэнэн https://edersaas.ru/1-8-kylaastar/ киирэн ааҕыххытын сөп .

Салгыы оскуола оҕолоро хайдах үөрэнэллэрий, туох дьаһал ылылларый диэн ыйытыыга СӨ Үөрэҕин уонна наукатын министиэристибэтигэр:

— Бастатан туран, РФ Үөрэҕириигэ министиэристибэтэ 1-8-с уонна 10-с кылаастар онлайн үөрэнэллэригэр интэриниэтинэн туһаналларын кыччатарга, ол эбэтэр төһө кыалларынан офлайн дьарыктаналларыгар диэн ыйыллар. Онлайнынан ордук 9-с уонна 11-с кылаастар үөрэнэллэригэр кыаҕы биэрии  диэн.

Иккиһинэн, ОГЭ туттарыы болдьоҕун үөрэх дьыла бүппүтүн кэннэ эрэгийиэннэр бэйэлэрэ быһаараллар. Маныаха үөрэх дьыла бүтүүтүн туһунан тэрийээччи (учредитель) итиэннэ Үөрэх уонна наука министиэристибэтин сөбүлэҥинэн үөрэх тэрилтэтэ бэйэтэ быһаарыы ылынар. ОГЭ-ни икки сүрүн биридимиэккэ эрэ туттарыллар диэн ыйыллар – математика уонна нуучча тыла. Үөрэх дьыла дистанционнай ньыманан барбыт Бүтүн Арассыыйатааҕы бэрэбиэркэлиир үлэ (ВПР) кэнниттэн эрэ түмүктэнэр кыахтаах.

Оттон 11-с кылаастары үһүс чиэппэр түмүгүнэн ЕГЭ-ҕэ сыһыана суох биридимиэттэринэн аттестациялыыр кыах баар, маны үөрэх тэрилтэлэрэ быһаараллар. Сүрүн тирэҕи ЕГЭ-лээх биридимиэттэргэ уурабыт.

Бу РФ Үөрэҕириигэ министиэристибэтин суругун сүрүн түгэннэрэ. Билигин бары пууннары анаалыстаан көрөн баран сөптөөх суругу дуу эбэтэр бирикээһи дуу үөрэх управлениеларыгар ыыталыахпыт”, — диэн иһитиннэрдилэр.

Онон күн бүгүн чопчу туох эрэ быһаарыы ылыллыбыт диэн түмүк оҥостор сыыһа. РФ Үөрэҕириигэ министиэристибэтин сүбэ (рекомендательный) суруга эрэ буолар.

Людмила ПОПОВА, edersaas.ru

+1
0
+1
0
+1
0
+1
0
+1
0
+1
0
+1
0