Билигин үгүс тас дойду сабыылаах буолан, сайыҥҥы сынньалаҥнарыгар дьон-сэргэ куораттан тыаҕа талаһар буолла.
Чуолаан төрөппүттэр оҕолорун эбэлэригэр-эһэлэригэр, аймахтарыгар ыытаарга дьулуһаллар. Кинилэр балаһыанньаларыгар киириэххэ, өйдүөххэ сөп — сибиэһэй салгын, тахсааты кытары тэлгэһэ, ыраас салгын оҕоҕо эрэ буолбакка хас биирдии киһиэхэ наада буоллаҕа.
Билиҥҥи туругунан, Ньурба улууһугар балаһыанньа этэҥҥэ. Ол эрээри, улаханнык саҥарар сатаммат, поруомнар сырыылара саҕаланан, массыына сырыыта биллэ элбээтэ. Ил Дархан Айсен Николаев дьаһалынан, бу ый 14 күнүгэр диэри дьону таһар такси сырыыта бобуллан турар.
Ньурба улууһугар улуус баһылыга Алексей Иннокентьев дьаһалынан, хас биирдии кэлии-барыы барыта оройуоннааҕы суһал штаб көҥүлүнэн эрэ диэн быһылынна. Арай, онкологическай, гемодиализнай ыарыһахтар, таһаҕас тиэйэр массыыналар уонна өлбүттээхтэр айанныахтарын сөп.
Ол эбэтэр атын кыһалҕалаах дьон улуус дьаһалтатыгар кэлэн эбэтэр электроннай буостанан көҥүл биэрэллэригэр көрдөһүү сурук суруйар, маны анал хамыыһыйа 1-3 күҥҥэ диэри көрөр, онтон быһаарыытын тиэрдэр. Инньэ гынан, кэлии-барыы барыта учуоттанан иһэр, айанньыт кимнээҕи кытары алтыспыта, хаһан барбыта-кэлбитэ барыта көстө сылдьар.
Ньурба улууһун икки кыраныыссатыгар күнүстэри-түүннэри ППС, ГИБДД үлэһиттэрэ уонна волонтердар дьуһуурустубаҕа тураллар. Анал көҥүллээх эрэ дьону аһардаллар. Оттон киирэр дьон булгуччу 14 күн хааччахтааһыҥҥа олороллор.
Ньурба улууһун дьаһалтата.