Бүлүү эргин улуустары сибиэһэй сымыытынан уонна көтөр этинэн хааччыйыыга үлэлиир «Ньурбатааҕы көтөр фабриката» аахсыйалаах уопсастыба 43 тыһыынча 800 кууруссаны иитэн турар.
edersaas.ru
Сотору манна сымыыты уурар улахан ыскылаат тутуллан үлэҕэ киириэҕэ. Хаһаайыстыба генеральнай дириэктэрэ Петр Гаврильев кэпсииринэн, ааспыт 2019 сылы этэҥҥэ түмүктээбиттэр. Быйыл 9 мөл. 800 тыһ. устуука сымыыты ыларга былаанныыллар. Билигин кыраапык кыранан аһара толоруллан иһэр.
– Эми-тому уонна аһылык эбиилигин эрдэттэн хааччыммыппыт, онон көрдөрүүбүт үчүгэй, – диир Петр Гаврильев. – Уу суола аһыллыар диэри аһылыкпыт саппааһын хааччына сылдьабыт. Тимир суолунан Новосибирскайтан 700 туонна, ол эбэтэр 9 богуон комбикуорум кэлиэхтээх. Кулун тутар саҕаланыыта биир богуон кэлбитин Аллара Бэстээхтэн массыынанан тастарбыппыт. Бу күннэргэ аны икки богуон кэлэрэ күүтүллэр. Муус устар 7 күнүгэр диэри барыта таһыллан бүтүөхтээх. Онтон сайын уу суолунан эбии 1000 туоннаны аҕалтарыахпыт.
Былырыын сымыыты өр кэмҥэ харайарга аналлаах ыскылааты тутуу саҕаламмыта. Кэлэр ыйга үлэҕэ киллэриллиэ. 0 кыраадыстан + 5 кыраадыска диэри температураны тутар технологическай улахан эбийиэк буолар. Тымнытар тэрилэ 2000 дьааһык сымыыты (биир дьааһыкка 360 сымыыт киирэр) батарыахтаах. Үлэтин 90 %—а бүттэ. Бу быйылгы саамай тутаах тутуубут буолар итиэннэ атын эбийиэктэргэ быстах өрөмүөн үлэтэ ыытыллыаҕа. Сымыыты улуус таһыгар таһааран атыылыы олоробут. Ньурба куоракка баар маҕаһыынтан ураты, Үөһээ Бүлүүгэ маҕаһыыннаахпыт эрэсиим быһыытынан үлэлии тураллар. Туох-баар инструкцияны барытын тутуһабыт, массыынабытын күн аайы хлордаах сириэстибэнэн дезинфекциялыыбыт. Ураты санитарнай-эпидемиологическай эрэсиим усулуобуйатыгар бородууксуйабытын киэҥник атыылааһыны – дьаарбаҥканы тохтоттубут. Бары тустаах уорганнар ыйыыларын ылан олоробут уонна тутуһабыт, барыыны-кэлиини хааччахтаатыбыт. Биэлсэри кытта дуогабардаахпыт, кини сарсыарда үлэ чааһа саҕаланыан иннинэ үлэһиттэри барыларын температураларын уонна дабылыанньаларын кээмэйдиир. Медик тутуу бара турар эбийиэгэр эмиэ үлэһиттэри көрөр, хонтуруоллуур.
Биһиэхэ, көтөр фабрикатыгар, эрэсиимнээх эбийиэк буолан, үлэбитигэр уруккуттан мааска, колпак уонна бэрчээкки кэтэрбит ирдэнэр. Онон ити сөп буолар саппааһын хаһаанабыт, манна кыһалҕа суох. Кыраныысса таһыттан, соҕурууттан кэлбит үлэһит диэн суохтар. Тыа хаһаайыстыбатын министиэристибэтигэр нэдиэлэ аайы сибиэдиэнньэ ыыта, отчуоттуу олоробут.
Геннадий Антонов, «Саха сирэ» хаһыат edersaas.ru сайтыгар анаан.