Сыл аайы ытык кырдьаҕастарга булчуттар кустаабыт кустарыттан амсаталлара үгэскэ кубулуйда.
edersaas.ru
Ордук сыстыганнаах дьаҥтан харыстанан дьиэҕэ олорор эрэсиим кэмигэр кырдьаҕастарга сибиэһэй куһу амсатан, болҕомто уурар өссө күндү буоллаҕа.
Чурапчы улууһугар эдэр урбаанньыт Айсен Толстоухов саастаах дьон дьиэҕэ олорор кэмнэригэр Ньукуолуҥҥа үгэс быһыытынан кус амсатар туһуттан булчуттарга аахсыйа тэрийдэ уонна бу үтүө дьыалаҕа кыттыһалларыгар социальнай ситимнэринэн ыҥырыы таһаарда. Биир бастакынан ыҥырыыны урбаанньыт Николай Диодоров өйөөтө.
Быйылгы сибиэһэй куһу амсайбыт кырдьаҕастар, биллэн турар, махтаныахтара турдаҕа.
Оттон Атамай нэһилиэгин баһылыга Роман Федоров сэрии тулаайаҕар, Атамай нэһилиэгин бочуоттаах олохтооҕор Савва Алексеевка бастакы булдуттан бэрсэн үөртэ. Савва Николаевич нэһилиэк сайдыытыгар, үлэтигэр -хамнаһыгар ис сүрэҕиттэн көмөлөһөр, нэһилиэк биир көхтөөх уопсастыбанньыга.
Бу маннык бэрт интэриэһинэй сонуннары түмэн, Горнай улууһун землячествота бэйэтин инстаграмыгар кэпсиир.
Елена ПОТОЦКАЯ, «Саха сирэ» хаһыат, edersaas.ru
Хаартыска — Горнай землячествотын инстаграмыттан.