Таатта улууһугар, Ытык Күөлгэ, ытык-мааны кырдьаҕастарын Ньукуолуннаттылар. Куһунан, собонон күндүлээн үөртүлэр. Бу туһунан биһиэхэ улуустааҕы култуура уонна духуобунай сайдыы управлениетын салайар Гаврил Вырдылин кэпсээтэ:
—Бүгүн улууспут килбэйэр киинигэр, Ытык Күөлгэ, Таатта нэһилиэгэ, «Сарыал» култуура киинэ, бэтэрээннэр сэбиэттэрэ уонна ыччаттар түмсэн тыыл бэтэрээннэригэр, сэрии сылларын оҕолоругар, ытык кырдьаҕастарга анаан Ньукуолун бырааһынньыгын тэрийдилэр. Маннык тэрээһин биһиэхэ иккис төгүлүн ыытылынна.
Дьоро күн саҕаланыытыгар алгысчыт аал уоту оттон айах тутта, алгыс баһын сыалаата. Ол кэннэ, күөх сайыҥҥа үктэммит үөрүүнү үксэтэн эҕэрдэлэр этилиннилэр.
Быйылгы түһүлгэбитигэр 100-тэн тахса ытык кырдьаҕас кэллэ. Кинилэри 82 эмис куһунан, минньигэс собонон, арыылаах алаадьынан, саламаатынан, о.д.а. сахалыы аһынан-үөлүнэн күндүлээтилэр. Долгуйа күүппүт үөрүүлээх тэрээһиннэриттэн ытык-мааны дьоммут улаханнык үөрдүлэр, сэргэхсийдилэр. Оонньууга-көргө кытыннылар, ирэ-хоро сэһэргэстилэр. Эдэр ыччакка бу курдук болҕомтолорун ууран ытыктабыллаахтык сыһыаннаһалларын иһин махтаннылар, алгыс тыл бастыҥын анаатылар.
Дьоро күн ыытыллыбыт элбэх куһу билии куонкуруһугар 22 араас куһу ааттаан Иван Саввич Никифоров эмис хааһынан наҕараадаланна. Хойукка диэри ырыа-тойук дьиэрэйдэ, эҕэрдэ эйэҕэһэ этилиннэ.
Биһиги корр., «Саха сирэ» хаһыат, edersaas.ru