Бүгүн А.Е.Кулаковскай аатынан норуоттар доҕордоһууларын дьиэтигэр «Саха сирин норуоттарын ассамблеята» уопсастыбаннай түмсүү 25 сылынан эрэгийиэннэр икки ардыларынааҕы пуорум үөрүүлээх быһыыга-майгыга арылынна.
Бэҕэһээ туспа былаан быһыытынан ыытыллыбыт улахан этнографическай диктант суруйуутугар Дьокуускай куораттан уопсайа 60 киһи кыттыбыта. Кинилэр Арассыыйа норуоттарын култуураларын, үгэстэрин төһө билэллэрин бэрэбиэркэлэммиттэрэ. Киэһээ «ЭтноКраса-2019» дьоҕуру, дириҥ билиини-көрүүнү, талааны көрдөрөр күөн күрэскэ 14 кыыс күрэстэспитэ.
Оттон бүгүҥҥү долгутуулаах тэрээһини СӨ Ил Дарханын уонна Бырабыыталыстыбатын администрациятын салайар Афанасий Владимиров эҕэрдэ тылынан аста. Сомоҕолоһуулаах, түмсүүлээх буоллахха Ийэ дойдуну сайыннарар кэскиллээх үлэ тэриллэрин эттэ. Доҕордуу дьоҥҥо ыраах да чугас буоларын, ыарахан да чэпчиирин бэлиэтээтэ. Эйэлээх, доҕордуу, бэйэ-бэйэни өйөһөр, өйдөһөр уонна түмсүүлээх буолуу сүдү күүс буоларын тоһоҕолоото.
Эҕэрдэ тылларын түһүлгэҕэ мустубут ыалдьыттарга Камчаткаттан кэлбит «Содружество» түмсүү бэрэссэдээтэлэ Рамазан Гусейнов тиэртэ. Салгыы А.Е.Кулаковскай аатынан норуоттар доҕордоһууларын дьиэтин генеральнай дириэктэрэ Яна Игнатьева эҕэрдэтин тиэрдэн туран, Саха сирин норуоттарын ассамблеята уопсастыбанньыктар көҕүлээһиннэринэн 1994 сыллаахха тэриллибитин, онтон ыла үлэ-хамнас сайдан, тэнийэн, күн бүгүн 70-тан тахса түмсүү улуустарынан өрө көтөҕүллүүлээхтик үлэлиирин кылгастык сырдатта. Түһүлгэҕэ мустубут дьоҥҥо үөрүүлээх тэрээһининэн бэртээхэй кэнсиэр көрдөрүлүннэ.
Салгыы «Ассамблея народов — проводник государственной национальной политики» төгүрүк остуолу СӨ Тас сибээскэ уонна норуоттар дьыалаларыгар миниистири бастакы солбуйааччы Владимир Васильев салайан ыытта. Ону сэргэ, «Стратегия СО НКО в соременных медиа: позиционирование, продвижение, взаимовыгодное сотрудничество со СМИ» (Илья Любицкай, Хабаровскай), «Проблемы подготовки грантовых заявок среди СО НКО» (Татьяна Сейфи, Хабаровскай), «Голос моего народа: сила сознания единства» (Анна Вахрунова, Москва) сэминээрдэр элбэх киһини, ордук эдэр ыччаты түмэ тартылар.
Сэминээргэ сылдьыбыт дьон иһитиннэрэр-биллэрэр маассабай сириэстибэлэргэ, социальнай ситимнэргэ болҕомтолорун туохха туһаайалларыгар, матырыйаал төбөтүн толкуйдааһыҥҥа, эбэтэр бэйэ дьыалатын арыйыан баҕалаахтарга туох кыһалҕалар сүрүннээн баар буолуохтарын сөбүн, үлэ түмүктээх буоларын ситиһэргэ, ону учуоттуулларыгар, болҕомтоҕо ылалларыгар сүбэ-саргы тыллар этиллибиттэрин,, о.д.а. киэҥ кэпсэтии тахсыбытын эттилэр.
Далааһыннаах тэрээһин түһүлгэтигэр Москаттан, Хабаровскайтан, Владимиртан, Иркутскайтан, о.д.а. сирдэртэн уопсастыбаннай түмсүүлэр бэрэстэбиитэллэрэ, эспиэрдэр кытталлар.