Cаха сирин Суруйааччыларын сойууһа норуодунай бэйиэт, тылбаасчыт, публицист, СӨ култууратын үтүөлээх үлэһитэ, И.М. Гоголев-Кындыл аатынан бириэмийэ лауреата, суруналыыстыкаҕа А.П. Илларионов аатынан бириэмийэ лауреата, ССРС Суруналыыстарын сойууһун чилиэнэ, ССРС Суруйааччыларын сойууһун чилиэнэ, СӨ Суруйааччыларын сойууһун чилиэнэ, Үөһээ Бүлүү улууһун уонна Боотулуу нэһилиэгин Бочуоттаах олохтооҕо Василий Тарасович Сивцев күн сириттэн күрэммитинэн дириҥ кутурҕанын тиэрдэр.
Василий Сивцев саха литературатын сайдыытыгар улахан кылаатын киллэрбитэ. Бастакы хоһооно 1954 сыллаахха “Эдэр коммунист” хаһыакка бэчээттэниэҕиттэн, бэйэтин ураты суолун булан, айымньылаахтык үлэлээн барбыта. Бэйиэт айар үлэтин биир сүрүн тиэмэтинэн Кэм уобараһа буолбута. 1961 сыллаахха тахсыбыт “Үрүҥ былыттар” хомуурунньукка ол ырылхайдык көстүбүтэ. Василий Тарасович 600-тэн тахса сонеты суруйбута, 20-тэн тахса хоһооннор хомуурунньуктарын таһаартарбыта. “Күнүм киэһэрэн эрдэҕинэ” диэн 2 томнаах кинигэтигэр бэйэтэ алтыспыт улахан суруйааччылар тустарынан ахтыыларын, ыстатыйаларын бэчээттэппитэ.
Кини талааннаах тылбаасчыт этэ – эбээн бэйиэттэрэ А. Кривошапкин, В. Лебедев хоһооннорун сахалыы саҥардыбыта.
Талааннаах, муударай, бөлүһүөктүү өйдөөх-санаалаах, патриот киһи – бэйиэт Василий Сивцев туһунан сырдык өйдөбүл саха норуотун сүрэҕэр мэлдьи хаалыаҕа, кини аата ааттаныаҕа, тыыннаах айымньылара дьон-сэргэ дууһатын өрүкүтэ, долгута туруохтара.
Саха сирин Суруйааччыларын сойууһа.