Николай Бугаев: «2019 сыл мусуой үлэтигэр дьиҥнээх сомоҕолоһуу сыла буолбута»
Бүгүн, ыам ыйын 27 күнүгэр, Ил Дархан Айсен Николаев Ил Түмэн 17-с уочарата суох пленарнай мунньаҕар 2019 сылга судаарыстыбаннай былаас ситэриилээх уорганнарын үлэтин-хамнаһын туһунан отчуоттаата.
Емельян Ярославскай аатынан Хотугу сир норуоттарын устуоруйатын уонна култууратын судаарыстыбаннай холбоһуктаах мусуойун дириэктэрэ Николай Дмитриевич Бугаев ааспыт сыл түмүктэрин туһунан бэйэтин санаатын үллэһиннэ:
— Айсен Сергеевич Ил Түмэн иннигэр отчуотун иһиттим. Дакылаат эрэ иһин буолбакка, уопсайынан 2019 сыл түмүктэрэ тус бэйэм санаабар куһаҕана суохтар.
Былырыын биһиги мусуойбутугар Ил Дархан, бырабыытылыстыба чилиэннэрэ хаста даҕаны кэлэн, тэрилтэбит тыын боппуруостарын ырыппыттара. Соторутааҕыта “Парламент чааһын” кэмигэр мусуой дьиэтин саҥардыы боппуруоһа көрүллүбүтэ, онон бу сылга элбэх үлэ барарын күүтэбит.
Былырыын Сомоҕолоһуу сылыгар Айсен Николаев кэргэнин кытта мусуой дьыалатыгар тус бэйэлэрин кылааттара Арассыыйаҕа билиммитэ, “Сыл мецената” наҕарааданан бэлиэтэммиттэрэ. Ол курдук, кинилэр “Сохраним памятники” бырайыак чэрчитинэн, бэйэлэрин үптэринэн Чөркөөх мусойугар эрэгийиэҥҥэ суолталаах култуура нэһилиэстибэтин эбийиэгин чөлүгэр түһэриигэ кыттыбыттара. Ити бачыымы билигин өрөспүүбүлүкэҕэ элбэх тэрилтэ, урбаанньыт, көннөрү дьон өйөөн, үлэ ыыппыттара. Онон ааспыт сыл мусуой үлэтигэр дьиҥнээх сомоҕолоһууну аҕалбыта диэхпин баҕарабын.
Егор Карпов, edersaas.ru