Бу күннэргэ Үүнэр көлүөнэ тыйаатыра Татарстаан Буинскай куоратыгар ыытыллар национальнай тыйаатырдар Норуоттар икки ардыларынааҕы III бэстибээллэригэр кыттарга ыҥырыы тутта.
edersaas.ru
Бу туһунан тыйаатыр дириэктэрэ, СӨ култууратын үтүөлээх үлэһитэ Матрена Павлова маннык иһитиннэрдэ:
— Биһиги араас таһымнаах тэрээһиннэргэ өрүү кыттабыт. Бу аан дойдутааҕы таһымнаах национальнай тыйаатырдар бэстибээллэригэр Уильям Шекспир «Ромео уонна Джульетта» трагедиятыгар олоҕуран, режиссер, СӨ искусствотын үтүөлээх диэйэтэлэ Александр Титигиров туруорбут «Таптал баарын тухары…» испэктээҕин дьүүллүүр сүбэ көрүүтүгэр сайаапкалаабыппыт.
Сотору буолаат, кириитиктэр кэллиэгийэлэрэ испэктээги үрдүктүк сыаналаабыттарын туһунан официальнай сурук уонна ыҥырыы туппуппут.
Онон ыам ыйын 12-19 күннэригэр Татарстааҥҥа кытта бараары кынаппытын куурда сылдьабыт.
Бу олус улахан суолталаах национальнай тыйаатырдар Норуоттар икки ардыларынааҕы III бэстибээллэригэр Турцияттан, Сербияттан, Ирантан, Швецияттан, Эстонияттан, Украинаттан, Молдоваттан, Узбекистантан, Казахстантан, Москваттан, Санкт-Петербуртан, Оренбуртан, Калмыкияттан, Башкирияттан, Чувашияттан кэлэн, драматическай уонна академическай тыйаатырдар кыттыыны ылыахтара. Үүнэр көлүөнэ тыйаатыра статустаах тыйаатыр соҕотох — Саха сириттэн.
Онон артыыстарбытыгар бу бэстибээлгэ тиийэн, үрдүк ситиһиилэнэн, Тыйаатыр сылыгар Сахабыт сирин олохтоохторугар өссө биир күндү бэлэҕи ууналларыгар баҕарабыт.
Елена ПОТОЦКАЯ, «Саха сирэ» хаһыат, edersaas.ru
Хаартыска — Үүнэр көлүөнэ тыйаатырын архыыбыттан.