Алтынньы 10 күнүгэр өрөспүүбүлүкэ үрдүнэн дьоҕус суудуналарга өрүс суолунан сырыы сабыллыбытын үрдүнэн, дьон доруобуйаларын, олохторун толук ууран туран айанныыртан толлубаттар. СӨ Быыһыыр сулууспата иһитиннэрэринэн, алтынньы 16 күнүгэр икки суһал биллэрии киирбит.
Ол курдук, алтынньы 13 күнүгэр киэһэ икки киһи «Обь» мотуордаах оҥочонон Нам улууһун Түбэ нэһилиэгиттэн Кэбээйи Батамайыгар туруммуттар даҕаны, тиийиэхтээх сирдэригэр тиийбэтэхтэр. Дьоннорун кытта кэпсэтэллэригэр биэрэктэн арахпыттарын эппиттэр уонна сибээс быстан, биллибэтэхтэр. Онон сүппүт дьону көрдүүргэ бөртөлүөт тахсыбыт даҕаны, кинилэр иннилэринэ Дьокуускайтан «салгын подушкатынан» көрдүү барбыт волонтер айанньыттары булбутун, кинилэр доруобуйалара этэҥҥэтин биллэрбит.
Ыксаллаах быһыыга-майгыга түбэспит дьон кэпсииринэн, айаҥҥа туруммуттара 40 мүнүүтэ кэнниттэн өрүскэ улахан буурҕа түспүт, халлаан хараҥаран, мотуордара кумахтаах арыыга тиийэн кэтиллэ түспүт. Түүн силлиэ буурҕа ытыллан, тыал күүһүрэн, оҥочолоро тимирэн хаалбыт. Дьон арыыга тахсан быыһаммыттар. Төлөпүөннэрин иитиитэ бүтэн, суһал көмөнү сатаан ыҥырбатахтар. Олохтоох дьон сүппүт айанньыттары көрдүүргэ тахсыбыттар эрээри, боротуоха хам тоҥон, мууһуран хаалан, уу аннын сатаан чинчийбэтэхтэр.
Оттон алтынньы 16 күнүгэр киэһэ 23ч. 20 мүн. саҕана Томпо улууһун ЕДДС диспетчеригэр эрийэн, Мэҥэ-Алдан таһыгар Алдан өрүскэ «Yamaha-70» мотуордаах «Вельбот-45М» тыы биэрэктэн 100 м сиргэ түҥнэстибитин туһунан иһитиннэрбиттэр. Быһылаан түмүгэр тоҕус киһиттэн биэһэ быыһаммыттар, үһэ тымныы ууга хам ылларан, тыыннара быстыбыт, биир киһи сураҕа суох сүппүт.
Маннык хобдох түгэн тахсыбатын туһугар мотуордаах тыынан айанныыртан аны эһиил халлаан сылыйыар, өрүс мууһа барыар диэри туттунуо этигит диэн сэрэтэллэр.
Марианна Тыртыкова, «Саха сирэ», edersaas.ru