Наркоманнар аҕыйыы быһыытыйбыттар

Ааптар: 
Бөлөххө киир:

Бүгүн, бэс ыйын 26 күнүгэр, Наркоманияны уонна наркотигы сокуоннайа суохтук эргитиини утары охсуһуу күнэ бэлиэтэнэр. Биһиги өрөспүүбүлүкэбитигэр бу эйгэҕэ быһыы-майгы хайдах эбитий?

edersaas.ru


Биллэрин курдук, РФ Наркотигы эргитиини хонтуруоллуур федеральнай сулууспата былырыын саас сабыллыбыта. Инньэ гынан, наркотигы эргитиини утары охсуһуу бүтүннүү ис дьыала уорганнарыгар сүктэриллибитэ.

Ол курдук, СӨ Ис дьыалаҕа министиэристибэтин пресс-сулууспата биһиги сайтпытыгар иһитиннэрбитинэн, бу сыл бастакы үс ыйыгар, ол эбэтэр, тохсунньу-кулун тутар ыйдарга, өрөспүүбүлүкэ үрдүнэн наркотикка сыһыаннаах 193 буруйу оҥоруу бэлиэтэммит (2016 сыл үс ыйыга р— 233). Итинтэн 121 буруй, ол эбэтэр, 62,7%-на ыар уонна ураты ыар буруйга киирсэр, 68 буруй эбэтэр 35,2% наркотигы батарыыга сыһыаннаах.

Ис дьыала министиэристибэтэ бэлиэтииринэн, бу эйгэҕэ быһыы-майгы уруккуга тэҥ сыһа итиэннэ кыралаан аҕыйыыр аакка баран иһэр.

Наркотигынан үлүһүйээччи ахсаана эмиэ аҕыйыы быһыытыйбыт. Сүрүннээн, бу — 25-40 саастаах дьон.

Кэлиҥҥи сылларга ордук киэҥник синтетическэй наркотик тарҕанара биллэр.

Санаан көрдөххө, наркотигы туттааччылар ханна да атын планетаҕа буолбакка, биһиги аттыбытыгар бааллар. Кинилэри тас көрүҥнэриттэн хайдах билиэххэ сөп эбитий?

Полиция уорганнарын ойуулааһыннарынан, наркоман диэн — үксүгэр, бэйэтин көрүммэт, таҥаһа-саба имиллибит-хомуллубут, сирэйэ хараҥытыҥы, илиилэрэ көҕөрбүт, харахтарын уота өспүт хатыҥыр киһи. Тутта-хапта сылдьара эмиэ олуона буолан, киһи хараҕар быраҕыллар.

Оттон наркоманнар мустар сирдэрин (наркопритоннары) хайдах билиэххэ сөбүй? Полиция этэринэн, подъезд иһэ ураты, химическэй аһыы сыттаах буолар, туора дьон элбэхтик сыбыытыыр, онно-манна шприцтэр, эмтэр хахтара быраҕыллыбыт буолуохтарын сөп.

Дьэ, итинниги сибикилээтэххэ, ханна, кимиэхэ этэбитий? Дьокуускай куорат Кальвица уул., 1Б нүөмэригэр баар СӨ ИДьМ-тын Наркотигы эргитиини утары охсуһар управление дьиэтигэр эбэтэр «итэҕэйии төлөпүөнүгэр» — 8 (4112) 42-22-22.

Быйыл саас, кулун тутар ыйга, биир улахан холуобунай дьыала суут көрүүтүгэр барбыт. Бу бөлөх («преступное сообщество») чилиэннэрэ 2013 сылтан саҕалаан, 2015 сылга диэри кэмҥэ интэриниэт ситимигэр дойду үрдүнэн синтетическэй наркотигы тарҕатыынан, батарыынан дьрыктаммыттар. Бу дьыалаҕа суут уурааҕа тахса илик.

Вера МАКАРОВА, «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0