«Нам улууһа» МТ салалтата бэрт кэскиллээх дьыалаҕа ылсыбыт холобура — улуус социальнай сайдыытыгар туһуламмыт пуонданы тэрийии. Бу сонун хайысхалаах үлэлээх тэрилтэни Андрей Бочкарев салайар.
edersaas.ru
«Пуондабыт үлэтэ далааһыннаах хайысхалаах – спонсордары кытта ыкса үлэлэһэн, бюджет таһыттан үп киириитин тобулуу», — диэн кэпсэтиибитин саҕалыыр Андрей Бочкарев.
— Билиҥҥи туругунан: 144 – муниципальнай, 25 — судаарыстыбаннай, 10 – чааһынай дьонтон уонна уопсастыбаннай тэрилтэлэртэн уопсайа 11 025 130,23 (уон биир мөлүйүөн сүүрбэ биэс тыһыынча сүүс отут солкуобай сүүрбэ үс) харчы киирдэ. Ол курдук, нэһилиэктэр дьаһалталарыттан – 454 173,04 солкуобай, култуура тэрилтэлэриттэн – 838 592,28 солкуобай, уопсай үөрэхтээһин тэрилтэлэриттэн – 2 094 035,40 солкуобай, оскуолаҕа киириэн иннинэ саастаах оҕолор уһуйааннарыттан – 1 057 756,97 солкуобай, эбии үөрэхтээһин тэрилтэлэриттэн – 305 137,67 солкуобай, муниципальнай тэрилтэлэртэн – 538 893,86 солкуобай, судаарыстыбаннай тэрилтэлэртэн – 1 154 997,90 солкуобай, атын тэрилтэлэртэн – 4 314 823,11 солкуобай, биирдиилээн дьонтон, уопсастыбаннай тэриллиилэртэн – 266 720,00 солкуобай киирдэ.
Киирбит үбү туохха туһаннылар?
— Киирбит үп пааркаҕа дьон олорон сынньанарыгар 80 ыскамыайка, нэһилиэктэр түһүлгэлэригэр балаҕан, ураһа тутууларыгар, Нам улууһун чулуу олоҥхоһуттарын: Бэдьээлэ, Бочоох, Буоратай бюстарын, Олоҥхоһут өйдөбүнньүгүн, паарка 3D каартатын оҥорууга, Олонхо Ыһыаҕын видеокилиибин устууга, Нам улууһун кыраныыссатын саҥардыыга, Нам нэһилиэгин, паарканы киэргэтиигэ, спортивнай түһүлгэҕэ ыскамыайка оҥоруутугар, ыһыах канонунан оҕо оонньуур былаһааккатын, «Алгыстаах кымыс түһүлгэтин» тутууга уо.д.а. үлэлэргэ барда.
Кэскиллээх былаан
— Олоҥхо Ыһыаҕын этнография тиһигэр сылы эргиччи үлэлиир балаҕан тутуллуоҕа. Норуот өйөбүлүнэн уонна спонсордартан үбүнэн кыһыннары үлэлиир гына генеральнай спонсор “АЯМтрансервис” ХЭУо тутуоҕа. Бу күннэргэ Нам улууһун дьаһалтатын кытта сөбүлэсиһии түһэрсиллиэҕэ.
Маны таһынан, Нам дьоно тумус туттан ааттыыр киһибит — Мыымах кинээс бастакы нууччалар кэлиилэригэр “Буойун“ диэн 2-с Хомустаах сиригэр остуруок тутан көрсүбүтэ. Саха сирэ Арассыыйа империятыгар киириитэ онтон саҕаламмыта. Мыымах олоҕор сыһыаннаах документальнай киинэ оҥороору сылдьабыт. Онно үбүлээһин эмиэ пуондаттан көрүллүөҕэ.
Баҕа санаа туоллар ханнык!
— 2014 сылга тус бэйэм Сынньалаҥ пааркатыгар фонтан оҥорбутум. Билигин ол фонтаным “филиалын” — Туос ураһаҕа кэлэр суолга урукку көлүччэҕэ күөл оҥорон, кубалары ыытыахпын баҕарабын. Нам улууһа куба гиэрбэлээх. Оччотугар ол кубалар улууспут гиэрбэтин туоһулара буолан, тыыннаахтыы уста сылдьаллара – бэртээхэй көстүү буолуо этэ…
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.