Эстрада судаарыстыбаннай тыйаатырыгар Нам улууһуттан төрүттээхтэр Саҥа дьыллара үрдүк таһымнаахтык, ситиһиилээхтик ааста.
edersaas.ru
Бэһис сылын бырааһынньыгы киин куораттааҕы Нам түмсүүтэ тэрийэн ыытта. Тэрээһин туһунан Нам улууһун түмсүүтүн чилиэнэ Мария Габышева маннык сырдатта:
— Бырааһынньык тэрээһинэ сыл аайы тупсан, киэркэйэн, үрдүк таһымнанан иһэрэ киһини эрэ үөрдэр. Саҥа сылы алгыһынан арчыланан көрүстүбүт. Анаан-минээн 2-с Хомустаахтан Айаал Местников кэлэн, алгыс сиэрин-туомун оҥордо. Бастатан туран, улууспут баһылыга, ытыктабыллаах Юрий Слепцов кэлэн тэрийсиигэ кыттыспыта барыбытын олус үөртэ уонна сомоҕолоото. Улуус баһылыга нэһилиэктэр баһылыктарын уонна дьаһалта эппиэттээх үлэһиттэрин илдьэ кэлбит.
Аны бүтүн өрөспүүбүлүкэни салайсар киэн туттар биир дойдулаахтарбыт: тыа хаһаайыстыбатын миниистирэ Александр Атласов, тас дойдуларга сыһыан миниистирэ Гаврил Кириллин, дьарыктаах буолуу кэмитиэтин салайааччыта Степан Москвитин уонна Ил Түмэн дьокутаата Алексей Еремеев ис сүрэхтэриттэн биир дойдулаахтарын эҕэрдэлээбиттэрэ умнуллубат түгэнинэн буолла.
Үүммүт 2020 сыл Улуу Кыайыы 75 сылын көрсө улуус бэтэрээннэрин Сэбиэтин бэрэссэдээтэлэ Софья Кобякова бэйэтин истиҥ эҕэрдэтин тиэртэ.
Онтон кэлбит дьон бары биир дойдулаахпыт Илья Чаҕылҕан тылларыгар суруллубут, кыайыыны уһансыбыт «Хайыһар» ырыаны бары сүһүөхтэригэр туран күргүөмүнэн ыллаабыттара ордук долгутуулаах буолла. Баяҥҥа култуура үтүөлээх үлэһитэ М.С. Павлов доҕуһуоллаата.
Нам түмсүүтэ (сал. Г.Г. Местников) 2019 сыл бастыҥнарын бэлиэтээтэ. Ол курдук:
— «Бастыҥ предприниматель» номинациянан Александр Никифоров («Копиртехсервис» тэрилтэ салайааччыта), «Бастыҥ режиссер» номинацияҕа 13-с Олоҥхо Ыһыаҕын ыытыыга үлэлэспит Иван Новиков тигистэ, «Бастыҥ спортсмен» номинациянан Дыгын Оонньууларын призера Артем Варданян бэлиэтэннэ. «Бастыҥ киинэ режиссера» номинация хаһаайынынан «Мымах — кремень государства» киинэни устубут Александр Лукин, «Бастыҥ суруналыыс» номинациянан «Саха» НКИХ, «Аал-луук мас» биэриитин ааптара Евдокия Избекова бэлиэтэннэ.
Маны сэргэ улуус баһылыга Юрий Слепцов бастыҥ үлэлээх биир дойдулаахтар түмсүүлэрин — Хатыҥ-Арыы уонна 2-с Хомустаах нэһилиэктэрин бастыҥнарынан бэлиэтээтэ. Наука эйгэтигэр ытык киһибит, историческай наука доктора, М.К. Аммосов аатынан ХИФУ профессора И.С. Сивцев бэйэтин анал бириэмийэтин, Модуттан төрүттээх ХИФУ физкультураҕа институтун эдэр директорыгар Н.Е. Гоголевка туттарда.
Киирии билиэттэринэн элбэх сүүйүүлээх лотерея оонньонно. Бириис олохтообут хас да дьонноохпут, олортон үтүө үгэс буолбут — «Кэрэ» ательеттан саха таҥаһа. Бу сырыыга баархат халадаай былааччыйа оонньонно. Тэрилтэ салайааччыта А.С. Колесоваҕа истиҥ махталбытын тиэрдэбит. Маны тэҥэ Намтан төрүттээх дьон оҥоһуктара, Намнааҕы педагогическай колледж устудуьуоннарын үлэлэрэ барыта бириискэ оонньонно.
Төрөөбүт улууспут Нам туһунан элбэх ырыаны иһиттибит. «Кыыс кэрэ — Нам сирэ» диэн ырыа ааптара Андрей Замятин бэйэтинэн ыллаан сүрэхпитин үөртэ. Ирина Неустроева уонна Афанасий Иванов «Эҥсиэлим хочото» ырыалара дойдубутун санатта, ахтылҕаммытын таһаарда.
Ити курдук, айар куттаах дьон, суруйааччылар, мелодистар, худуоһунньуктар, суруналыыстар уо.д.а. салааларга ситиһиилээхтик үлэлиир Нам дьоно-сэргэтэ бииргэ түмсэн, көрсөн, кэпсэтэн, үөрэн-көтөн тарҕастыбыт.
2020 с. өрөспүүбүлүкэҕэ биллэриллибит Патриотизм сылын намнар чахчы да төрөөбүт дойдубутугар бэриниилээхпитин, түмсүүлээхпитин көрдөрөн саҕалаатыбыт. Уопсастыбаннай тэрилтэлэр улууспутугар өйөбүл буоларбыт туоһутунан улуус нэһилиэктэриттэн биир дойдулаахтар бары сомоҕолоһон, патриотическай санаанан салайтаран, ааспыт Олоҥхо ыһыаҕын үрдүк таһымнаахтык тэрийэн ыыппыппыт буолар.
Салгыы Мария Николаевна харах уулаах, хаан тохтуулаах Аҕа дойду Улуу сэриитин сылларыгар «торуой хомустаахтар» күөллэргэ муҥхалаан, быччыыкка балыгынан аччыктааһынтан дьону быыһаабыттарын кэпсээн баран маннык түмүктээтэ:
— Ол өйдөбүлүгэр быйыл муҥхалаан Улуу Кыайыы 75 сылыгар анаан «тыыл бэтэрээннэригэр балык түҥэппиттэрэ уонна биир дойдулаахтар түмсүүлэрин бырааһынньыгар «торуой хомустаахтар» лотерея анал бирииһин быһыытынан биир куул быччыыка туруордулар.
Ол куул быччыыканы Үөдэй нэһилиэгин баһылыга Семен Ядреев сүүйэн баран, Дьокуускай куоракка олорор быйыл 75 сааһын туолар үбүлүөйүгэр убайыгар Владимир Татариновка бэлэхтээтэ.
Ити курдук Нам улууһуттан сылдьар биир дойдулаахтар көрсүһүүлэрэ олус тэрээһиннээхтик ааста.
Елена ПОТОЦКАЯ, «Саха сирэ» хаһыат, edersaas.ru