Нам улууһун Партизан нэһилиэгин олохтоохтохторо араас тэрээһин буолар буолан, быйылгы сылы олус көхтөөхтүк көрүстүлэр.
edersaas.ru
Нэһилиэк баһылыгын солбуйааччы Полина Скрябина иһитиннэрбитинэн, «Саха» НКИХ «Үҥкүүлээ» өрөспүүбүлүкэтээҕи бырайыагын чэрчитинэн нэһилиэккэ «Үҥкүү бырааһынньыга» буолан ааста. Манна түөрт үҥкүү куруоһуоктарын салайааччылара бэйэлэрэ дьарыктыыр үҥкүү ансаамбылларын кытта үс түһүмэхтээх үҥкүү күрэҕэр күөн көрүстүлэр.
— Ол курдук 1-кы түһүмэххэ салайааччылар бэйэ-бэйэлэрин кытта «сольнай» дэнэр үҥкүүнэн «кииристилэр». Эдэр учууталлар «Айылгы» үҥкүү бөлөҕүн салайааччыта Нария Романова, ыччаттар «Тэтим» үҥкүү бөлөхтөрүн салайааччы Мария Аргунова, «Күбэйэ» нэһилиэк дьахталларын үҥкүү бөлөхтөрүн салайааччы Диана Парникова, «Саһарҕа»үҥкүү бөлөх салайааччыта Нюргуяна Сысолятина бэйэлэрин үҥкүүлэрин көрдөрдүлэр. 2-c түһүмэххэ үҥкүү бөлөхтөрө бу дьоро киэһэҕэ анаан саҥа үөрэппит үҥкүүлэрин биир дойдулаахтарын дьүүлүгэр таһаардылар. Оо, бииртэн биир кэрэ киһини абылыыр кэрэ үҥкүү! Бу таҥастара сиэдэрэйин уонна маанытын! 3-с түһүмэх — киэһээҥҥи мааны таҥаһы кэтэн танго үҥкүүнү толоруу. Дьүүллүүр сүбэҕэ «Мичээр» үҥкүү бөлөҕүн салайааччыта Татьяна Филиппова, «Хомус» фольклор дьиэтин салайааччыта Семен Алексеев, «Сандаара» үҥкүү бөлөҕүн салайааччы Алексей Дьячковскай, «Арчыһыттар» үҥкүү бөлөҕүн салайааччы Любовь Муксунова, «Мичилий» үҥкүү бөлөҕүн салайааччыта Анастасия Протопопова олордулар. Тэҥнээҕин булбакка, «Муҥутуур кыайыылаах» номинацияҕа «Айылгы» үҥкүү бөлөҕө (сал. Нария Романова) тигистэ. Бу дьоро киэһэни «Үҥкүүлээ» бырайыак финалистара — Салбаҥ нэһилиэгиттэн «Мичилий» үҥкүү бөлөҕө уонна 1-кы Хомустаах нэһилиэгиттэн «Чэбдик» үҥкүү бөлөҕө киэргэттилэр, — диэн кэпсиир Полина Ивановна.
Ити курдук, Партизан нэһилиэгин үҥкүүһүттэрэ Нам улууһун олохтоохторо үҥкүүнү көҕүлүттэн туппут дьон буолалларын бигэргэттилэр.
Елена ПОТОЦКАЯ, «Саха сирэ» хаһыат, edersaas.ru