Ситэриилээх былаас отчуота бүгүн Нам улууһун Кыһыл дэриэбинэ уонна Граф Биэрэгэ сэлиэнньэлэригэр буолла.
edersaas.ru
Олохтоохтор отчуокка олус көхтөөхтүк кытталлар, араас интэриэһинэй ыйытыылары биэрэллэр.
Ол курдук, Айталина Винокурова улуустары тэҥнээн көрөн, килиэп сыаната араастаһыытын ырытта:
— Биһиги нэһилиэкпитигэр Кыһыл Дэриэбинэҕэ килиэп сыаната 42 солк. Мэҥэ Хаҥалас улууһунааҕар (онно 30-тан тахса солк.) тоҕо ыараханый?» — диэн туоһуласта. Ону тэҥэ кини кулууп дириэктэрин быһыытынан, «Спутник- нэһилиэктэр» диэн ааттанар нэһилиэнньэлээх пууннар кулууптарын сабар туһунан сурах төһө олохтооҕун ыйытта.
«Биһиэхэ саҥа кулууп былырыын ахсынньыга киирбитэ. Олохтоох дьон ахсаана элбии турар, 300 киһи буолла. Онон сайдар саҕахха үктэммит нэһилиэк кулууба сабыллымыан наада«, — диэн эттэ. Ыйытыыларга СӨ Сыана бэлиитикэтин судаарыстыбаннай кэмитиэтин салайааччыта Антонина Винокурова маннык хоруйу биэрдэ:
— Дьокуускайга килиэп сыаната 67-69 солк. Намҥа — 50-53 солк. Ол эбэтэр Дьокуускайга килиэп сыаната 23%-нан үрдүк. Мин бу биир буулканы киилэтигэр таһааран холобурдуубун. Килиэби тыа сиригэр сүрүннээн аччыгый бизнес эйгэтин үлэһиттэрэ — предпринимателлэр оҥорон таһаараллар. Кинилэр бурдуктарын, ууларын, коммунальнай ороскуоттарын бэйэлэрэ уйунар буолан, сыаналарын бэйэлэрэ быһаллар.
Кыһыл Дэриэбинэ олохтооҕо Андрей Евстафьев Мэҥэ Хаҥалас Хаптаҕайын бурдук оҥорон таһаарар собуота төһө көдьүүстээхтик үлэлиирин, эт аһы переработкалыырга туох кэскиллээх былаан баарын ыйытта.
Бырабыыталыстыба бөлөҕүн салайааччыта Антонина Винокурова тэрилтэ бородууксуйаны оҥорон таһаарар кээмэйэ кыра буолан, көдьүүстээхтик үлэлээбэтин бэлиэтээтэ. Улуус баһылыга Юрий Слепцов былырыын оройуон сайдыытын Стратегията оҥоһуллубутун бэлиэтээтэ.
— Бу суолталаах докумуону оҥорорго нэһилиэктэртэн кэккэ сонун бырайыактары көрдөөбүппүт. Онно эт аһы оҥорон таһаарыыга хас да кэскиллээх көрүү баара. Онон улууска бу салааҕа конкуренция үөскээн, эт аһы оҥорон таһаарыы кээмэйэ үрдүөҕэ, — диэн эттэ.
Лариса Багынанова батсаапка сотору-сотору ыараханнык ыалдьар дьоҥҥо анаммыт Аһымал кэнсиэрдэр буолалларын туһунан иһитиннэрии кэлэрин, судаарыстыба тоҕо итинник ыарыһахтар эмтэниилэрин уйбатын туһунан ыйытта.
Маны таһынан Кыһыл Дэриэбинэ олохтооҕо «Айыы кыһата» оскуола, тыа хаһаайыстыбатыгар сыһыаннаах, эмп тэрилтэтин, интернет туһунан уо. д. а. үгүс ыйытыыны биэрдэ. Кини интэриэһиргээбит ыйытыыларыгар барытыгар толору хоруйу ылла.
Отчуот кэнниттэн бырабыыталыстыба бөлөҕүн чилиэннэрэ баҕалаах дьону кытта сирэй көрсөн, кинилэр санааларын иһиттилэр. Олохтоохтор уустук боппуруостарга өйөбүл ылан, санаалара көнньүөрэн тарҕастылар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.