Бу саҥа үүммүт 2017 сыл тохсунньу ыйын 1 күнүттэн накаастабыл саҥа көрүҥэ — кыһалаҥ үлэҕэ ууруу — дойду үрдүнэн олоххо киирдэ.
Вера МАКАРОВА, «Саха сирэ», https://edersaas.ru/
Маннык миэрэ кыра уонна орто буруйу итиэннэ ыар буруйу аан бастакытын оҥорбут дьоҥҥо туттуллар буолуоҕа. Сууттар бу миэрэни 2 ыйтан 5 сылга диэри көҥүлү быһыы оннугар туттуохтарын сөп.
Маныаха сууттаммыт киһиэхэ кэккэ хааччахтар бааллар: үлэни бэйэтэ булара бобуллар, дьаһалта көҥүлэ суох үлэтиттэн уурайар уонна көннөрөр киинтэн тахсан барар бырааба суох.
Ону тэҥэ, арыгы иһии, азартаах оонньууларга кыттыы кытаанахтык бобуллар. Ол оннугар хамнас төлөнөр, Үлэ кодексынан көрүллэр быраап, медицинскэй страховкалааһын тутуһуллар, бэл диэтэр, туох да сэмэтэ-суҥхата суох хаайыылаахха уоппуска бэриллиэн сөп.
Маннык миэрэнэн сууттаммыт дьон анал көннөрөр кииҥҥэ, уопсай дьиэлэргэ буруйун боруостуоҕа. Бастакы түөрт киин номнуо аһыллан, тохсунньу 1 күнүттэн кыһалаҥ үлэҕэ ууруллубут 900 хаайыылааҕы ыларга бэлэмнэр — Ставропольскай уонна Приморскай кыраайдарга, Тамбовскай уонна Тюменскай уобаластарга.
РФ Накаастабылы толорор федеральнай сулууспата бигэргэтэринэн, маннык көннөрөр кииннэр сотору кэминэн дойду бары регионугар баар буолуохтаахтар. Сүрүннээн, көс-холуонньаларга аһыллыахтара эрээри, маннык миэрэнэн сууттаммыттар атын хаайыылаахтартан туспа уопсай дьиэҕэ олоруохтара.
Саамай сүрүнэ — кыһалаҥ үлэҕэ ууруллубут киһи уопсастыбаттан тэйитиллибэт.
Вера МАКАРОВА, «Саха сирэ», https://edersaas.ru/
Туһанылынна:Ria.ru сайтан.