Мэҥэ Хаҥалас I Наахаратыгар баһаары умулларыыга олохтоохтор үлэлээтилэр
Мэҥэ Хаҥалас I Наахаратыгар отучча биэрэстэлээх сиргэ ойуур баһаарын бохсуу атырдьах ыйын 4 күнүгэр түмүктэммит. Олохтоох дьаһалта уонна олохтоохтор оройуоннааҕы тыа хаһаайыстыбатын инспекциятын уонна өрөспүүбүлүкэтээҕи ЕДДС үлэһиттэрин кытта быһа сибээстэһэ, ойуурга уот балаһыанньатын туһунан биллэрэ олороллор.
Бэлиэтээн суруйдахха, баһаар нэһилиэнньэлээх пууҥҥа чугаһаан, отучча килэмиэтир тэйиччи сиргэ бара турбута. Олохтоох дьаһалта дьону уонна сүөһүнү эвакуациялыырга бэлэмнэнии үлэтин тэрийэн истэҕинэ, баһаар бохсулунна.
Хас эмэ сүүһүнэн гектардаах ойуур баһаарын умулларыыга ЫБММ (МЧС) үлэһиттэрин кытта олохтоохтор тэҥҥэ үлэлээтилэр. Хас биирдии киһи тус олоҕун, үлэтин умнан туран, уоту умулларыга күүс-көмө буолла, төһө кыалларынан бэйэлэрин тиэхиньикэлэрин үлэлэттилэр. Афанасий Кириллин салалтатынан Владимир Алексеев, Александр Потапов, Владимир Макаров, Иван Егоров, Гаврил Федоров, Михаил Денисов, Иван Сивцев, Валерий Кириллин, Александр Игнатьев күүс-көмө буоллулар диэн баһылык Алексей Григорьев бэлиэтиир.
Атырдьах ыйын 9 күнүгэр ойуурга турбут 12 баһаары умуллараллар: итилэртэн аҕыһа өссө да умайар, түөрт баһаар бохсулунна. Тыаҕа 1178 гектардаах сиргэ уот сиир.
Умулларыыга 639 киһи кыттар, ити иһигэр ойууру сиринэн харабыллыыр 104 киһи, 270 парашютист уонна десантник, ЫБММ 110 үлэһитэ. Кинилэргэ олохтоохтортон 150 киһи көмөлөһөр. Уоту утары охсуһааччылар 40 тиэхиньикэни туһаналлар.
edesaas.ru