Мындыр өй кыһалҕаны быһаарар (видео)

Ааптар: 
Бөлөххө киир:

Иннокентий Егомин Өлүөхүмэ улууһун Кыыллаах нэһилиэгин олохтооҕо. 1984 сыл оскуоланы бүтэриэҕиттэн, сопхуос ыһыллыар диэри тырахтарыыстаабыта, уһулуччулаах механизатор.

edersaas.ru


Сопхуос ыһыллыбыт тыраахтарын кытта өрөмүөннээн сүүрдэрэ. Биир сыарҕаҕа икки кэбиһиилээх оту тиэйэр сатабыллаах үлэһит. Оҕо сылдьан «Планета» матасыыкыллаах этэ. Иккилии оҕону олордон хатааһылатара. Биирдэ даҕаны охторбутун өйдөөбөппүн.

Кеша оҕо эрдэҕиттэн аҕатыгар иитиллэн, ийэ таптала диэни билбэккэ улааппыта. Ыарахан олоҕу, кыһалҕаны үлэлээн мүччү көтөрү этинэн-хаанынан билбитэ. Билигин Иннокентий Валентинович ыал амарах аҕата, элбэх сиэннэрдээх. Сайын аайы хото оттуур. Уолаттарын төһүү үлэһит дьон гына иитэлээтэ. Кыһалҕаны бэйэтинэн билбит буолан, оҕолоро ыарахантан чаҕыйан турбакка үлэлээн иитинэллэригэр уһуйар. Билигин Иннокентий от хомуйар кыраабыллары, кэбиһэр тэриллэри бэйэтэ толкуйдаан оҥорорго холонор. Тыраахтар редукторыттан мас хайытар тэрили уонна да атыны айан оҥорорго талаһар. «Исаков» диэн сүүнэ дьааһык иһигэр, от кэбиһэр тэрили толкуйдаабыттара. Ону Иннокентий бэйэтин идиэйэтин киллэрэн оҥостубута. Онон кэбиһэ сылдьыбыппыт. Абыраллаах тэрил этэ. Түүрдэриллибит от субуутунан тыраахтар соһон ааһар, ону транспортер эрийэн үөһэ таһааран дьааһыкка кутар. Чаас курдугунан биир кэбиһиилээх от бэлэм буолар.

Тыа киһитигэр үлэ үгүс. Үп-харчы даҕаны куруук кырыымчык. Элбэх оҕолоох ыалга кумахха ууну куппуттуу симэлийэр. Ол иһин, балаһыанньаттан тахсар туһугар толкуйдуурга күһэллэҕин. Билигин оту рулоннуурга элбэх шпагат быа ороскуоттанар. Кыһалҕаны атаһым Лэгэнтэй мындыр өйүнэн быһаарбыт. Маҕаһыынтан атыыласпыт рулоннаах быа биирдэ туттулунна да быраҕыллан иһэр буоллаҕына, кини ол быаны, бэйэтэ айан оҥостубут станогунан төттөрү эриттэрэн ылар эбит. Маҕаһыынтан хайдах атыыласпытай да, оннук бөрөһүөҥкэлээх быаны оҥорон таһаарар уонна хас да сыл туһанар.

Сайын устата элбэх оту эрийтэрэр отчуттар 50 тыһыынча солкуобайга тиийэ ороскуотуруохтарын сөп эбит. От былдьаһыктаах кэмигэр онтуҥ өссө маҕаһыыҥҥа баара биллибэт. Онон Лэгэнтэй ньыматын туһаныҥ. Абыраныаххыт, махтаныаххыт.

edersaas.ru саайтка анаан Родион ДАНИЛОВ-Ородьумаан.

+1
0
+1
0
+1
0
+1
0
+1
0
+1
0
+1
0