Муоста бары кыһалҕаны быһаарыаҕа

Ааптар: 
Бөлөххө киир:

Бэҕэһээ дойду бэрэсидьиэнэ Владимир Путин Өлүөнэ эбэни туоратар муостаны тутары өйөөбүтүн туһунан үөрүүлээх сонун тилийэ көттө. Кырдьык даҕаны, өр күүппүт баҕа санаабыт туолар суолга киирэн эрэр.

Мин урбаанньыт быһыытынан тыа сирин олохтоохторун хааччыйыыга күүскэ үлэлиибин. СӨ Судаарыстыбаннай Мунньаҕын (Ил Түмэн) дьокутаата да буоларбынан, Саха сирин олохтоохторун кыһалҕаларын быһаарсыыттан туора турбаппын. Өлүөнэ муостатын тутуу илин эҥэр улуустар олохтоохторугар эрэ буолбакка, хоту дойдуга олорооччуларга, Сахабыт сирин соҕуруу өттүгэр айаннааччыларга эмиэ тутаах боппуруос. Таһаҕаспытын тиэйэрбитигэр суол хаалар кэмигэр төһөлөөх эрэйи көрөрбүт буолуой? Билигин Арассыыйа Бырабыыталыстыбата муостабытын тутууга сөптөөх үбү-аһы торумнаан, кэтэх инвестор көмөтүнэн олоххо киирэригэр эрэл кыыма саҕылынна. Маныаха Ил Дархаммыт Айсен Николаев туох да күчүмэҕэйдэртэн иҥнибэккэ, киин федеральнай былааһы кытта тиһиктээхтик үлэлээбитэ төһүү буолла. Ону дойдубут бэрэсидьиэнэ Владимир Путин “тутарга уолдьаста” диэн визалаабыта даҕаны туоһулуур.
Баараҕай тутуу олоххо киирдэҕинэ, саха норуота барыта абыраныа. Таһаҕас тиэллиитин ороскуота аччаан, бородуукта, ас-таҥас сыаната түһүөҕэ. Сылы эргиччи айанныыр, атын эрэгийиэннэри кытта сибээстэһэр буолуохпут. Аллараа Бэстээххэ кэлбит тимир суолбут эмиэ көдьүүстээхтик үлэлииригэр кыах үөскүөҕэ. Онон ыра санаабыт олоххо киирэрин эрэ кэтэһэбит.

Руслан Федотов, СӨ Судаарыстыбаннай Мунньаҕын (Ил Түмэн) дьокутаата, СӨ норуотун хаһаайыстыбатын үтүөлээх үлэһитэ, меценат,

edersaas.ru саайтка анаан

+1
0
+1
0
+1
0
+1
0
+1
0
+1
0
+1
0