Муома баһылыга Иван Павлов: “Бу сылга федеральнай бүддьүөттэн көмө улаатта”

Бөлөххө киир:

Иван ПАВЛОВ, Муома улууһун баһылыга:

— Ил Дархаммыт Айсен Сергеевич Николаев үлэтин-хамнаһын, бииргэ үлэлэһэ сылдьар дьон, барытын өйбүтүнэн-санаабытынан, эппитинэн-хааммытынан билэн олоробут. Былырыын Ил Дархан быыбарыгар Айсен Сергеевич биһиэхэ Муомаҕа 85,7 % ылан кыайбыта.

Бу сылы Сомоҕолоһуу сылынан биллэрэн, биһигини, улуус, оройуон  баһылыктарын түмэн, сомоҕолоон, экологиябытыгар—айылҕабытын харыстааһыҥҥа болҕомтобутун туһаайан, Улуу Кыайыы 75 сыла туолуутун дьоһуннаахтык көрсөргө эмиэ сыаллаан-соруктаан, салайан, күүскэ үлэлэтэ сылдьар.

Бүддьүөт өттүгэр, чөлүгэр түһэриигэ, бүддьүөппүтүн сөптөөхтүк туһаныыга туһуламмыт биир улахан үлэ ыытыллар. Айсен Сергеевич федеральнай министиэристибэлэри, бырабыыталыстыбаны кытта ыкса үлэлэһэн, өрөспүүбүлүкэ туһугар бөдөҥ форумнарга кыттан, болҕомтону тарта. Ол түмүгэр биһиэхэ, холобур, доруобуйа харыстабылыгар улахан социальнай эбийиэктэр тутуллар буоллулар. Производствоны ыллахха – бу сыл устата Айсен Николаев үгүс промышленнай оройуоннарга уонна тыа хаһаайыстыбатынан дьарыктанар улуустарга сырытта. Итиннэ, биллэн турар, холобур, нолуок бэлиитикэтин кытта ситимнээн,  кэккэ кыһалҕалар баалларын билэбит эрээри,  хамсааһын тахсан эрэр диэххэ наада.

Бу сылга Саха сиригэр федеральнай бүддьүөттэн көмө улаатта, эбии харчы киирдэ. Итиэннэ, инвестицияны тардыыга Айсен Сергеевич ситиһиилээх үлэни ыытар. Суол оҥоруутугар, дьиэ тутуутугар федеральнай бырагырааматтан эмиэ үп-харчы кэллэ.

Уонна, биир сүрүнэ – эбии 8 улуус, ол иһигэр Муома оройуона, Арктическай зонаҕа киирдибит. Манна өрөспүүбүлүкэ уһуннук, күүскэ үлэлэстэ. Онон, дьоммут-сэргэбит Ил Дархаммытыгар, Бастакы бэрэсидьиэннэрбитигэр, сенатордарга, дьокутааттарбытыгар барҕа махталлаах. Бу сыл биһиэхэ биир бэлиэ сыл буолла.

edersaas.ru

+1
0
+1
0
+1
0
+1
0
+1
0
+1
0
+1
0