Айсен Николаев 2019 сыл түмүгүнэн табаһыттар династияларыгар бэриллэр граны Муома улууһун удьуор табаһыттарыгар, Громовтар дьиэ кэргэттэригэр, туттарар туһунан дьаһалы таһаарда.
Громовтар үгэс буолбут дьарыктарын сөргүтэр, салгыы сайыннарар сыалтан эһээлэрин, Худи-Харючи Николай Васильевич аатынан, аҕыйах ахсааннаах хотугу төрүт омуктар аҕа ууһунан общиналарын тэринэн таба иитэллэр. Табаһыт династия баһылыга Валерий Николаевич Громов табаны иитиигэ 1965 сылтан үлэлиир. Ити сыл кини аҕыс кылаастаах оскуола кэнниттэн аҕатын биригээдэтигэр табаһытынан киирбитэ. 1970 сылтан аҕатын солбуйан биригэдьиир муоһатын туппута. Үтүө суобастаах таһаарыылаах үлэтинэн социалистическай куоталаһыыларга элбэх төгүл кыайбыта, «Үлэҕэ килбиэнин иһин» мэтээлинэн, IX, X уонна XI бэтилиэккэлэр кыайыылаахтарын бэлиэтинэн наҕараадаламмыта. Түөрт оҕолоох, 16 сиэннээх кырдьаҕас табаһыт 2012 сылтан общинаҕа настаабынньыктыыр.
Валерий Николаевич улахан уола Иван Валерьевич 1989 сылтан табаһыттыыр. Эстибит “Искра” сопхуос чээрэтигэр тэриллибит «Искра» судаарыстыбанай-унитарнай тэрилтэ 8 №-дээх ыстаадатыгар 1996 сылтан биригэдьиирдээбитэ. Билигин Худи-Харючи Николай Васильевич, аатынан аҕыйах ахсааннаах хотугу төрүт омуктар аҕа ууһунан общиналарын салайар. Кини бырааттара Дьокуускайдааҕы тыа хаһаайыстыбатын академиятын бүтэрбит Арыйаан Валерьевич уонна Дьокуускайдааҕы тыа хаһаайыстыбатын техникумун бүтэрбит Николай Валерьевич община тутаах дьонноро буолаллар. Сиэннэр эмиэ табаҕа сыстаҕастар. Ол курдук, Айыына Ивановна 2017 сылтан, Черскэйдээҕи кэллиэскэ табаһыт-мэхэньисээтэр идэтин бүтэрбит Валерий 2018 сылтан общинаҕа үлэлииллэр. Кыыс бастыҥ иистэнньэҥ уонна үҥкүүһүт, оттон уол — спортсмен. Нэһилиэк култуурунай-маассабай олоҕор көхтөөхтүк кытталлар.
Күн бүгүн 1700 табалаах община улуус биир туруктаах үлэлээх хаһаайыстыбатын быһыытынан биллэр, социальнай тэрилтэлэрин таба этинэн хааччыйар. 2006 с. община базатыгар «Сонгачан» оҕо сайыҥҥы лааҕыра, 2009 сылтан көс оскуола тэриллибиттэрэ. Онон Иван Валерьевич кэргэнин, учуутал идэлээх Оксана Семеновнаны кытары кыракый оҕолору эбээннэр төрүт үгэстэригэр иитэллэр.
Раиса Сибирякова, «Саха сирэ» хаһыат, edersaas.ru