Дьокуускайга Новаторство сылын чэрчитинэн, ыам ыйын 17 күнүттэн нэһилиэнньэҕэ ананар сорох муниципальнай өҥөлөр электроннай көрүҥүнэн, Саха өрөспүүбүлүкэтин судаарыстыбаннай уонна муниципальнай өҥөлөргө порталыгар (www.e-yakutia.ru) оҥоһуллар буолуохтара.
edersaas.ru
Бырайыак маҥнайгы түһүмэҕэр муниципальнай өҥөлөр маннык көрүҥнэрэ киириэхтэрэ: сир учаастагын градостроительнай былаанын биэрии, муниципальнай оҕо саадтарыгар сайабылыанньаны ылыы, муниципальнай оҕо саадтарыгар оҕо уочаратын туһунан информацияны биэрии, даачаҕа, садка уонна оҕуруокка анаан сир учаастагар уочаракка туруоруу, бу уочарат туһунан информацияны биэрии, үс уонна онтон элбэх оҕолоох ыаллары сир учаастагар уочаракка туруоруу, бу уочарат туһунан информацияны биэрии.
Алексей Семенов, куорат дьаһалтатын информационнай технологиялары киллэриигэ уонна муниципальнай өҥөлөргө управлениетын начальнига:
— Нэһилиэнньэҕэ ордук маассабай муниципальнай өҥөлөрү электроннай көрүҥҥэ көһөрүү өҥө хаачыстыбатын тупсарыаҕа, көдьүүстээх итиэннэ дьэҥкэ оҥоруоҕа. Билигин чахчылары хомуйууттан саҕалаан, муниципальнай өҥөлөрү толорууга бэлэм быһаарыыларга тиийэ үлэ быстыбат тиһигин хааччыйар биир кэлим информационнай ситим оҥоһулла сылдьар. Кэлэр өттүгэр өҥө көрүҥэ элбэтиллэн иһиэҕэ.
Даҕатан эттэххэ, киин куорат олохтоохторун 90 %-на Интернет ситиминэн толору туһанар, ол иһиттэн 70 %-на Саха өрөспүүбүлүкэтин судаарыстыбаннай уонна муниципальнай өҥөлөргө порталыгар регистрациялаах.
Раиса Сибирякова, “Саха сирэ”, edersaas.ru