Өрөспүүбүлүкэтээҕи 2 №-дээх балыыһа—Суһал медицинскэй көмө киинин биир эпэрээссийэлиир саалата дакриоцисториноскопияҕа маастар-кылаас былаһааккатыгар кубулуйда.
Маастар-кылааһы Арассыыйа Президенин дьыалаларыгар управление кылаабынай оториноларинголога, Cудаарыстыбаннай медицинскэй академия оториноларингологияҕа кафедратын сэбиэдиссэйэ, м.н.д, профессор Владимир Козлов ыытта. Ол курдук, Арассыыйа сүрүн оториноларинголога хроническай дакриоциститы аныгы ньыманан биһиэхэ аан бастаан эпэрээссийэлээтэ. Манна даҕатан эттэххэ, маннык эпэрээссийэни оҥорор туһунан былырыын Дьокуускайга офтальмологтар уонна оториноларингологтар кыттыылаах научнай-практическай конференцияҕа ырытыспыттара.
Владимир Козлов быһаарбытынан, бу ньыма уратытынан эпэрээссийэ мурун нөҥүө оҥоһуллара буолар. Маннык эпэрээссийэ үксүгэр 15-20 мүнүүтэ устата барар.
– Эһиги үтүөкэннээх быраастардааххыт. Кинилэр сайдыыны кытары тэҥҥэ хардыылыырга кыһаллаллар. Лор-отделениеҕыт быраастара дойдуга биир бастыҥнарынан буолаллар.
Биһиги бүгүн үс кэрэ аҥаарга эпэрээссийэ оҥордубут. Аныгы ньымабыт кэнниттэн тириигэ эпэрээссийэ сиигэ уонна чэр хаалбат. Онон, тас көстүү бөрүкүтэ суох көрүҥнэниэ диэн куттал суох. Мурун көҥдөйүгэр оптическай эндоскоп (синньигэс имиллэҕэс туруупка) киллэриллэр. Эпэрээссийэ мурун салыҥнаах бүрүөтүн иһигэр оҥоһуллар, – диэн профессор эпэрээссийэ хаамыытын билиһиннэрдэ.
Ыалдьыт лор-отделение сэбиэдиссэйэ Иннокентий Александровы кытары оҥорбут эпэрээссийэлэрин биир идэлээхтэрэ эпэрээссийэлиир саалаҕа турар икки экранынан кэтээн көрдүлэр.
Саха Өрөспүүбүлүкэтин доруобуйа харыстабылыгар министиэристибэтин кылаабынай оториноларинголога Наталья Лебедева бэлиэтээбитинэн, бүгүҥҥү эпэрээссийэ балыыһа дьаһалтатын өйөбүлүнэн оҥоһулунна. Ол курдук, анал инструменнары уонна тэриллэри атыылаһарга бэлэмнэнии үлэтэ сыл устата барбыта. Маннык эпэрээссийэлэр инникитин даҕаны Өрөспүүбүлүкэтээҕи 2 №-дээх балыыһа базатыгар оҥоһуллуохтара.
Ити курдук, Саха сирин оториноларингологтара нэһилиэнньэҕэ медицинскэй көмөнү оҥоруу хаачыстыбатын уонна табыгастаах буолуутун үрдэтиигэ, маастарыстыбаны тупсарыыга өссө биир хардыыны оҥордулар. Кэрэхсэбиллээҕэ диэн, лор-отделение быраастара итинник эпэрээссийэни номнуо бэйэлэрэ оҥордулар.
Надежда ЕГОРОВА, «Саха сирэ» хаһыат, edersaas.ru