Эрдэ иһитиннэрбиппит курдук, ааспыт нэдиэлэҕэ накаастабылы толорор уорганнар Табаҕа бөһүөлэгэр баар 7 №-дээх кытаанах эрэсиимнээх холуонньаҕа улахан партия бобуулаах маллары булбуттара.
Вера МАКАРОВА, «Саха сирэ» хаһыат, https://edersaas.ru/
Холуонньа промышленнай зонатыгар тутуу матырыйаалларын таһыынан дьарыктанар массыына киллэрбит бобуулаах малларын — 30 суотабай төлөпүөнү, 15 гарнитураны, 13 ииттэрэр тэрили, 6 USB-кабели итиэннэ 10 л испиирдээх утаҕы кытары 950 гр доруоһаны — хаайыылаахтар кистиир сирдэриттэн булан былдьаабыттара.
Оттон бу сырыыга Хаҥалас улууһун Мохсоҕоллоох бөһүөлэгэр баар 6 №-дээх кытаанах эрэсиимнээх холуонньаҕа бобуулаах маллары хатыылаах боробулуоха нөҥүө быраҕа сатаабыт киһини тараччы тутан ыллылар. Бу киһи хаайыылаахтарга 3 пластиковай бытыылка испиирдээх утаҕы (5,5 л), 7 суотабай төлөпүөнү уонна 600 солк. харчыны тиэрдиэхтээҕэ бохсулунна.
Маннык дьайыылары оҥорбут киһи РФ Административнай кодексатын 19.12-с ыстатыйатынан эппиэккэ тардыллар.
Өссө төгүл санатар буоллахха, бобуулаах малларга киирэллэр — суотабай төлөпүөн, итирдэр утах, харчы уо.д.а.
Вера МАКАРОВА, «Саха сирэ» хаһыат, https://edersaas.ru/
Хаартыска: УФСИН пресс-сулууспата.