Өлүөхүмэ улууһа кыстыгы көрсө 19 107 т оту оттуур былааннаах, ол эрээри, сайын саҕаланыытыгар ардах түспэккэ, үүнүү мөлтөх буолан, барыллааһын быһыытынан 17 301 туонна оттонор туруктаах.
edersaas.ru.
– Үүнүү ордук Абаҕа, II Нөөрүктээйи уонна Кыыллаах нэһилиэктэригэр мөлтөх, – диир улуус кылаабынай агронома Сардаана Никитина. – Оту таһынан 1 626 т сиилэһи угар, 1 366 т сенаһы бэлэмниир былааннаахпыт, ону толоруохпут. Билигин ходуһаҕа 1 774 отчут, 58 толору мэхэньисээссийэлээх, 341 ситэтэ суох мэхэньисээссийэлээх биригээдэлэр уонна 21 көлө, 56 илии звенолара үлэлии сылдьаллар. Барыта холбоон 3 000 туонна оту чөкөттүлэр.
Сүөһү аһылыгын бэлэмнээһиҥҥэ улуустааҕы суһал ыстаап тэриллэн, хаста да мунньахтаатыбыт. Кырыымчык оттоох хаһаайыстыбалары хааччыйарга анаан, толору мэхэньисээссийэлээх үс мобильнай биригээдэ тэриллэн, оттуу сылдьаллар. Кинилэр улуус саппаас пуондатыгар 200 т оттуур соруктаахтар, онуоха олохтоох бүддьүөттэн 500 тыһ. солк. көрүлүннэ.
Нөөрүктээйилэр эрэллээхтэр
Кыстыгы көрсө 1 400 т оту оттуур соруктаах улуус саамай бөдөҥ хаһаайыстыбата, «Өлүөхүмэ кыладабыайа» ХЭУо, хас да толору мэхэньисээссийэлээх биригээдэни туруоран оттуу сылдьар.
Бас билии көрүҥүттэн тутулуга суох 350 ынах сүөһүлээх уонна 600 сылгылаах I Нөөрүктээйи нэһилиэгэ 1 300 туоннаны оттуур былааннаах. Олохтоох дьаһалта тыа хаһаайыстыбатыгар исписэлииһэ Виктор Хохолов иһитиннэрбитинэн, үрдүк сирдээх сыһыылар курааннаабыттар, ол оннугар өрүс арыылара үчүгэйдик үүнэннэр, кыстыыр оту хааччынарга эрэл баар эбит.
Улуус биир бөдөҥ нэһилиэгэ, 875 ынах сүөһүлээх, ол иһигэр 260 ыанар ынах итиэннэ 672 сылгылаах, II Нөөрүктээйи 1 810 т оттуохтаах.
– Былырыын ардах бэрт хойут, сир куурбутун-хаппытын кэннэ түспүтэ, аны быйыл бэс ыйыгар төрүт ардаабата, – диэн этэр нэһилиэккэ тыа хаһаайыстыбатын исписэлииһинэн алтыс сылын үлэлиир Семен Никитин. – Инньэ гынан, улуус үрдүнэн кырдал, алаас сирдэр курааннаатылар, эбиитин аһыҥа турда, оттон хотоол сирдэр уонна арыылар кэм үчүгэйдэр. Биһиги нэһилиэккэ курааннаабыт ходуһалаах ыаллар кыстыыр отторун булуммат туруктаахтар. Былырыын олохтоох дьаһалтаҕа тыраахтыр атыыласпыппыт, быйыл оттуур тэрили ылынныбыт. Онон сайаапка быһыытынан нэһилиэнньэҕэ оту оҕустаран биэриигэ өҥө оҥоробут итиэннэ «көҥүл хотуур» биллэрилиннэҕинэ, оттоммокко хаалбыт сирдэри оттооммут, отторо тиийбэт хаһаайыстыбаларга биэрэргэ былаанныыбыт. Итини таһынан, ыччат сүөһүнү иитиигэ идэтийэр бааһынай хаһаайыстыба баһылыга Николай Винокуров биир мобильнай биригээдэни тэрийэн, саппааска анаан 120 туонна оту чөкөтөн биэрэргэ
Раиса Сибирякова, «Саха сирэ», edersaas.ru