Университет саамай кыраһыабай уонна талааннаах устудьуона – Николай Дьяконов
Ааспыт нэдиэлэҕэ Саха сирин сүрүн үөрэҕин кыһатыгар – М.К. Аммосов аатынан Хотугулуу-Илиҥҥи федеральнай университекка “Мисс уонна Мистер ХИФУ” диэн сыллата ыытыллар кэрэ буолуу уонна талаан куонкуруһа буолла. Урукку сылларга тэҥнээтэххэ тэрээһин бэйэтэ да, кыттааччыларын таһыма да биллэ үрдээбитэ тута харахха быраҕыллар.
Үс нэдиэлэлээх куонкурус түмүгэр кыайыылаахтарынан инженерно-тиэхиньиичэскэй институт иккис кууруһун устудьуона Николай Дьяконов уонна финансово-экэнэмиичэскэй институт үһүс кууруһун устудьуона Саргылана Максимова буоллулар.
Куонкурус кэнниттэн санааларын уонна бэйэтин туһунан кыайыылаах Николай маннык кэпсиир:
— Мин Нам улууһун Түбэтиттэн төрүттээхпин, Покровскайга оскуоланы бүтэрбитим. Ыал улахан оҕотобун, кырачаан бырааттаахпын уонна балтылаахпын. Кинилэргэ үтүө холобур буола сатыыбын. Төрөппүттэрим миигин ханнык баҕар түбэлтэҕэ өйүүллэр, күүс-көмө буолаллар. Оскуолаҕа үөрэнэр сылларбар тустуунан, волейболунан уонна многоборьенан дьарыктаммытым. Университет устудьуоннарын идэлээх сойууһун актыбыыһабын, “Олимп” диэн спорт хамыыһыйатыгар баарбын.
— Куонкурус кэнниттэн санааларыҥ?
— Билиҥҥээҥҥэ диэри “Мистер ХИФУ” буолбуппун итэҕэйбэккэ сылдьабын. Наҕараадалааһын кэмин үйэм тухары умнуом суоҕа. Чугас доҕотторум өйөөннөр, барытыгар күүс-көмө буолбуттара. Сыанаҕа сылдьан кинилэр миэхэ ыалдьалларын, хаһыытыылларын-ыһыытыылларын истэн олус үөрбүтүм, бэл, долгуйбутум ааспыта. Куонкурус иннинэ киэһэ хойукка диэри репетициялыыр этибит, киһи сылайар аҕай этэ, ол да буоллар, билигин санаатахха, ол кэмнэри ахтар эбиппин. Саамай сүрүнэ, куонкурус кэмигэр олус элбэх доҕоттордоннум, уопутурдум, элбэҕи биллим-көрдүм.
— Кэрэ киһи диэн хайдах киһиний?
— Мин өйдүүрбүнэн, киһи тас көрүҥүнэн эрэ буолбакка, ис санаатынан баай, ыраас, чөл буолуохтаах.
— Туох былааннардааххын?
— Мин иккис кууруска үөрэнэбин, үөрэхпин этэҥҥэ бүтэрэн, тутааччы инженер буолуохпун баҕарабын. Бу идэ – дьиҥнээх эр киһи идэтэ, эппиэтинэһи, сыраны ирдиир.
Айтана Аммосова, edersaas.ru
Хаартыскалар — интэриниэттэн.