Билиҥҥи туругунан, аан дойду үрдүнэн “Мисс Вселенная”, “Мисс Мира”, “Мисс Интернешнл” уонна “Мисс Земля” диэн кэрэ кыргыттар куонкурустара саамай үрдүк рейтиннээхтэринэн биллэллэр. Манна кыайбыт кыргыттар аан дойду саамай кыраһыабайын аатын ылалларын таһынан баҕарар үлэлэрин, үөрэхтэрин булаллар, олохторун тосту уларыталлар.
Аан дойду таһымнаах куонкурустарга Саха сириттэн өссө кимнээх кыттыбыттарай:
2003 сыллаахха Филиппины Манила куоратыгар ыытыллыбыт 25 судаарыстыба кыргыттара кыттыылаах кэрэ кыргыттар куонкурустарыгар Саха сириттэн сылдьар Татьяна Никитина (“Мисс Виртуальная Якутия-2001”, “Мисс СГУ-2000”) кыайыылаах тахсыбыта. Татьяна бу куонкурус үгүс номинацияларыгар кыайан, эрэллээхтик бастакы миэстэни ылбыта. Бу кэнниттэн киниэхэ карьератын оҥосторугар, модель буоларыгар үгүс этии киирбитэ, ону аккаастаан, Дьокуускайга төннөн, үөрэҕин салҕаабыта.
Зарина карьерата 2006 сыллаахха ыытыллыбыт “Мисс Якутия” куонкурустан саҕаламмыта. Манна кини көрөөччүлэр биһирэбиллэрин ылбыта. Бу кэнниттэн тута модель быһыытынан үлэлээбитэ: “Золото Якутии” хампаанньа сирэйэ буолбута, Fashion House International бастыҥ үлэһитинэн ааттаммыта, Нью-Йорк куоракка баар “TRUMP” муода ааҕыныстыбатын кытта дуогабардаспыта. Икки сыл Париж, Милан, Токио, Шанхай, Нью Йорк уонна Москва Үрдүкү Муодатын нэдиэлэлэригэр ситиһиилээхтик кыттыбыта.
2004 сыллаахха Саха сирин саамай кэрэ кыыһын, Арассыыйаҕа иккис вице-мисс ааттарын ылан баран, Наталья Кытайга ыытыллыбыт “Мисс Интернешнл” куонкуруска кыттан, “Мисс Доброй Воли” номинация хаһаайката буолбута. Манна аан дойдуттан 79 кыыс илин-кэлин түһүспүтэ, оттон Арассыыйа аатын Наталья көмүскээбитэ. Кыыс 180 см үрдүгүнэн, бэртээхэй бөгүүрэтинэн судьуйалары сөхтөрбүтэ.
Полина аан дойду таһымыгар тахсыбыт, билиҥҥитэ сахалартан соҕотох модель буолар. 2014 сыллаахха Арассыыйа уон саамай кыраһыабай куоларын ахсааныгар киирбитэ. Үөһээ Бүлүү Быракааныттан төрүттээх кыыс “Мисс Виртуальная Якутия” куонкуруска кыайан, модель карьератын оҥостон, күн бүгүҥҥэ диэри үлэлии-хамныы сылдьар. Билигин Полина Лос-Анджелеска олорор, араас таһымнаах топ-көрдөрүүлэргэ кыттар.
2015 сыллаахха Турция Анталья куоратыгар ыытыллыбыт норуоттар икки ардыларынааҕы “Мисс Евразия” куонкурус финалыгар 33 дойду кырасаабыссатын кэннигэр хаалларан, Саха сириттэн сылдьар Ольга Думанская кыайыылаах тахсыбыта. Бу иннинэ кини Саха сиригэр ыытыллыбыт “Мисс Евразия-Саха”, “Мисс Бикини” куонкурустарга бастаабыта. Билигин Ольга “Мисс Бикини” куонкурус дириэктэрэ буолар, элбэх аахсыйаларга кыттар.
Олеся «Мисс Якутия-2011» куонкурус кыайыылааҕа буолар. 2016 сыллаахха “Мисс-модель Мира-2016” кэрэ куолар аан дойдутааҕы куонкурустарыгар ситиһиилээхтик кыттыбыта. Онно «ТОП-30» кырасаабыссаларыгар киирэн, Саха сирин, Арассыыйа аатын киэҥник ааттаппыта.
Саха кыргыттара ураты кэрэлэр
Аҕыйах хонуктааҕыта, “Саха Өрөспүүбүлүкэтин Кэрэ Куота-2017”, “II Вице-Мисс России-2018” Наталья Строева “Мисс Мира” куонкуруска күрэхтэһэ барар диэн үтүө сонун тарҕанна. Наталья бу сонуну бигэргэппитэ, кытта бараары номнуо бэлэмнэнэ сылдьарын иһитиннэрбитэ. “Мисс Мира” ахсынньы 8 күнүгэр Кытай Хайнань куоратыгар ыытыллыаҕа.
Наташа 19 саастаах, Дьокуускайга улааппыта, оскуоланы кыһыл көмүс мэтээллээх бүтэрбитэ. Ийэтэ – саха, оттон аҕата – нуучча, онон сахалыы саҥаны өйдүүр эрэ эбит. Оскуолаҕа үөрэнэр сылларыгар “Taya Models” муода ааҕыныстыбатыгар дьарыктаммыт. Кини билигин Москваҕа олорор, Н.И. Пирогов аатынан Арассыыйатааҕы национальнай чинчийэр медицинскэй университекка дерматолог быраас идэтигэр үөрэнэр.
«Мисс Россия» куонкурус тэрийээччилэрэ:
— Саха сириттэн сылдьар “II Вице-Мисс России-2018” титул хаһаайката Наталья Строева дойдубут аатын көмүскүү “Мисс Мира” куонкуруска кыттар буолла. Оттон “Мисс Россия-2018” кыайыылааҕа Юлия Полячихина Бангкокка ыытыллар “Мисс Вселенная” куонкуруска кыттыаҕа. Наташа кыттар “Мисс Мира” күрэхтэһиитэ Кытай Хайнань куоратыгар ахсынньы 8 күнүгэр буолар. Кини спордунан сөбүлээн дьарыктанар, омук тылларын үөрэтэр уонна олус элбэх кинигэни ааҕар. Куонкуруһугар номнуо бэлэмнэнэн саҕалаабыта. Сотору кэминэн Кытайга бэлэмнэнэр түһүмэхтэргэ кытта айанныаҕа. Саха сирин кыргыттара норуоттар икки ардыларынааҕы куонкурустарга куруук ситиһиилээхтик кытталларын бэлиэтиибит. Национальнай таҥас, талаан, дефиле түһүмэхтэригэр инники күөҥҥэ сылдьаллар, бэлэмнэрэ үрдүк таһымҥа буолар. Наталья Строеваҕа ситиһиилэри баҕарабыт.
«Мисс Мира-2018» куонкурус кыттааччылара:
Айтана Аммосова, «Саха сирэ» хаһыат, edersaas.ru