СӨ Үөрэҕин уонна наукатын министиэристибэтэ бэс ыйын 1 күнүттэн эбии үөрэхтээһини тэрийэр. Бу араас куруһуоктар, маастар-кылаастар, сэминээрдэр, дьарыктар буолаллар. Бырагыраамалар федеральнай, эрэгийиэннээҕи уонна улуус таһымнаахтар.
Босхо эбии үөрэхтээһин бырагыраамата оҕо интэриэһин хабар аналлаах. “Пандемия кэмигэр бары дьиэҕэ олорорго күһэллэбит уонна оҕолорбутун сайынын иллэҥ кэмнэрин интэриэһинэйдик аралдьытар туһунан толкуйдуубут. Биһиги ону хааччыйар кыаҕы тобуллубут. Өрөспүүбүлүкэ үрдүнэн номнуо бэс ыйын 1 күнүттэн босхо үөрэх бырагыраамалара үлэлиэхтэрэ. Бары хайысханы барытын көрдүбүт – муусука, успуорт, наука, аныгы технологиялар, о.д.а. Хас биирдии оҕо бэйэтин интэриэһинэн дьарыктаныаҕа. Мөлтөх интэриниэттээх улуустарга туспа ньыма оҥоһулунна. Ол курдук, оҕолор дьиэлэригэр олорон, туох даҕаны куттала суох интэриэһинэй куруһуоктарга дьарыктаныахтарын сөп”, — диэн миниистир бэлиэтээтэ.
Интерактивнай бырагыраамалар иилэринэн оҕолор босхо англия эбэтэр кытай тылын үөрэтиэхтэрин, биирдиилээн эбэтэр хамаанданан квиз оонньуохтарын, викторинаҕа кыттыахтарын, саха эстрадатын «сулустарын» кытта ыллыы үөрэниэхтэрин, остуоруйа уонна уус-уран айымньы холобурунан сокуон-быраап туһунан үөрэтиэхтэрин, маркетинг уонна биисинэс-былаан туһунан билсиэхтэрин, о.д.а. интэриэһинэй хайысхаларынан дьарыктаныахтарын сөп. Дьарыктар бары босхо уонна оҕо баҕатынан ыытыллаллар.
Оҕо эбии үөрэхтээһинин бырагыраамаларын “быһа линия” 8(914)282-30-32 нүөмэринэн (“Юные якутяне” өрөспүүбүлүкэтээҕи ресурснай киин, http://www.sakhaedu.ru) билсиэхтэрин сөп.
СӨ Үөрэҕин уонна наукатын министиэристибэтин пресс-сулууспата.