Бүгүн, тохсунньу 12 күнүгэр “Триумф” Спорка бэлэмнэнии киинигэр Саха Өрөспүүбүлүкэтин спорка министиэристибэтэ, буолаары турар Бэчээт күнүнэн сибээстээн спорду сырдатар, кэпсиир, көрдөрөр суруналыыстары кытта көрүстэ.
Петр Павлов, «Саха сирэ» хаһыат, www.edersaas.ru
— Бастатан туран, барыгытын Россия Бэчээккэ күнүн көрсө эҕэрдэлиибин!, — диэтэ спорт миниистирэ Георгий Балакшин. – Маннык көрсүһүү биһиэхэ үгэс быһыытынан ыытыллар. Инникитин өссө даҕаны ыкса ситимнээхтик үлэлиэхпит. Саҥа үүммүт 2017 сыл спорка олоҕо хаһан баҕарар буоларыныы, элбэх тэрээһиннэрдээх, күрэхтэһиилэрдээх буолуоҕа. Онуоха эһиги, суруналыыстар, улахан таһымнаах эрэ күрэхтэһиилэри буолбакка, биһиги министиэристибэбит ыытар үлэтин барытын хабан сырдатаргытыгар баҕарабын. Сүрүн сорукпут – спорду киэҥ араҥаҕа тарҕатыы, билиһиннэрии, тэнитии буолар.
Ити курдук эҕэрдэлээн туран, Георгий Русланович, быйылгы сылга биһиги өрөспүүбүлүкэбитигэр туох-ханнык улахан күрэхтэһиилэр ыытыллалларын билиһиннэрдэ. Ол курдук, 2017 сыл – Сурдлимпийскай оонньуу сыла. Манан сибээстээн, бу оонньууларга Россия көҥүл тустууга хамаандатын сүүмэрдиир сыаллаах чөмпүйэнээт биһиги Дьокуускайбытыгар олунньу 17-19 күннэригэр ыытыллаары турар. Маны тэҥэ, сыл спорка биир саамай улахан тэрээһининэн, түөрт сылга биирдэ ыытыллар спорт национальнай көрүҥнэригэр Манчаары ХХ спартакиадата буолар. Санатан эттэххэ, үбүлүөйдээх спартакиада от ыйын 6-10 күннэригэр Үөһээ Бүлүүгэ ыытыллыаҕа.
Маны таһынан, миниистир эппитинэн, Дьокуускайга устудьуоннар аан дойдутааҕы оонньууларын тэрийэн ыытыы боппуруоһа билигин үөрэтиллэ сылдьар эбит. Манан сибээстээн, бу күннэргэ СӨ бырабыыталыстыбатын бэрэссэдээтэлин солбуйааччы Михаил Гуляев Москваҕа тиийэн Виталий Муткону кытта көрсөн быһаарсыахтаах.
Спорт миниистирин солбуйааччы Марина Захарова бэйэтин эҕэрдэтигэр суруналыыстары улахан профессионалларгыт диэтэ, спорт киэҥник тэнийэригэр улахан үлэни ыытаҕыт диэн сыаналаата, “суруналыыһы атаҕа аһатар” дииллэрин курдук, чэгиэн-чэбдик доруобуйаны баҕарда.
Ол кэнниттэн суруналыыстар: СИА кэрэспэдьиэнэ Дьулустаан Сергеев, Hotu.su интэрниэт сайтын кэрэспэдьиэнэ Николай Константинов, спорт национальнай көрүҥнэргэ киинин отделын начаалынньыга Владислав Коротов, “Спорт Якутии” хаһыат кэрэспэдьиэнэ Николай Бястинов, “Саха” национальнай көрдөрөр-иһитиннэрэр компания суруналыыһа Ньургуйаана Егорова уо.д.а. миниистиртэн буолуохтаах күрэхтэһиилэр тустарынан ыйытыы биэрдилэр. Холобур, өссө былырыын күһүн иһитиннэриллибитинэн, Дьокуускай куорат 2017 сыллааҕы Россия боксаҕа чөмпүйэнээтин ыытарга сайаапка биэрбитэ. Г.Р.Балакшин хоруйдаабытынан, олунньу саҥата РФ боксаҕа федерациятын отчуоттуур-быыбардыыр конференцията ыытылларынан, ити боппуруос билиҥҥитэ быһаарыллыбакка турар диэтэ. Итиэннэ чөмпүйэнээти быйыл буолбакка, Олимпиада иннинээҕи сылга ылар ордук буолуо диэн сатаатын эттэ.
Ити курдук, көрсүһүү – миниистири кытта пресс-конференция курдук буолла.
Көрсүһүү үөрүүлээх чааһыгар спорт миниистирэ Георгий Балакшин Бэчээт күнүнэн суруналыыстарга өйдөбүнньүк бэлэхтэри туттарда, үлэлэригэр ситиһиини баҕарда.
Петр ПАВЛОВ.
Ааптар хаартыскаҕа түһэриилэрэ.