Миниистир Атласов этиитин өйөөн, Уопсастыбаннай сэбиэт ыҥырыы таһаарда
Тыа хаһаайыстыбатын министиэристибэтэ уонна Уопсастыбаннай сэбиэтэ халаан уутуттан эмсэҕэлээбиттэргэ чопчу аадырыстаах көмөнү оҥорорго быһаардылар.
Тыа хаһаайыстыбатын уонна ас-үөл бэлиитикэтин миниистирэ Александр Атласов өрөспүүбүлүкэ агропромышленнай комплексын тэрилтэлэрин салайааччыларыгар туһаайан, “сааскы халаан уутуттан эмсэҕэлээбит бааһынай хаһаайыстыбаларга, тыа хаһаайыстыбатын кэпэрэтииптэрин уонна АПК атын даҕаны тэриллиилэрин үлэһиттэрин дьиэ кэргэттэригэр аадырыстаах көмөнү оҥорууга үп-харчы хомуурун суһаллык тэрийэллэригэр” этии киллэрэн, сурук ыыталаата. Министиэристибэ аппараатын уонна министиэристибэ салаа тэрилтэлэрин үлэһиттэрэ бэҕэһээ, ыам ыйын 14 күнүгэр, мунньахтаан сүбэлэһэн баран, миниистирдэрин сиэрдээх этиитин бастакынан сүүс бырыһыан өйөөннөр, биир күннээх хамнастарын ыытарга быһаардылар.
Тыа хаһаайыстыбатын уонна ас-үөл бэлиитикэтин министиэристибэтин Уопсастыбаннай сэбиэтин бэрэссэдээтэлэ, ТХНЧИ дириэктэрэ, тыа хаһаайыстыбатын билимин дуоктара Айаал Степанов миниистир Александр Атласов этиитин өйүүрүн ааһан, өрөспүүбүлүкэ уопсастыбаннай тэриллиилэрин алдьатыылаах улахан халаан алдьархайыгар түбэспит тыа сирин олохтоохторугар уонна тыа хаһаайыстыбатын үлэһиттэригэр материальнай көмөнү оҥороллоругар ыҥырда. Айаал Иванович онуоха эмиэ эмсэҕэлээбит дьиэ кэргэн аҕа баһылыгын эбэтэр ийэ хотунун аатын-суолун сирэйдээн-харахтаан ыйан туран көмөлөһөр ордук көдьүүстээх буолуоҕун ыйда.
Василий НИКИФОРОВ.