Сарсыҥҥыттан Мииринэйгэ «АЛРОСА» хампаанньа бирииһигэр аан дойду күүстээх мадьынылара кыттыылаах өрөспүүбүлүкэтээҕи аһаҕас турнир ыытыллыаҕа. Алмаастаах куоракка Сергей Константинов, Павел Черноградскай, Сергей Фролкин курдук үрдүк кылаастаах мас тардыһыыктар кытталлара күүтүллэр.
Күрэхтэһии «Кимберлит» успуорт дыбарыаһыгар кулун тутар 14-15 күннэригэр ыытыллыаҕа. Мас-рестлиҥҥэ Саха сирин сүүмэрдэммит хамаандатын тириэньэрэ Николай Константинов СИА-ҕа иһитиннэрбитинэн, Кыайыы 75 сылыгар, Мииринэй төрүттэммитэ уонна алмааһу хостуур бырамыысыланнас 65 сылыгар анаан «АЛРОСА» хампаанньа уонна Мииринэй куорат быһылыгын бирииһигэр ыытыллар күрэхтэһиигэ күүстээх атлеттар кытталлара күүтүллэр эбит.
«Мас тардыһыыктар Дьокуускайтан уонна улуустартан бүгүн Мииринэйгэ айаннаатылар. Сүүмэрдэммит хамаанда лиидэрдэрэ эмиэ күрэхтэһиэхтэрэ. Аҕыйах хонуктааҕыта өрөспүүбүлүкэ чөмпүйэнээтэ буолан бүппүтэ, онон мадьыныларбыт үчүгэй туруктаах сылдьаллар. Мин билэрбинэн, Сергей Фролкин, Павел Черноградскай, Анатолий Гладков, Дьулуур Климовскай, Сергей Константинов, Семен Ануфриев, Владимир Трофимов уо.д.а. кытталлар«, — диэн Николай Константинов бэлиэтиир.
Турнирга уопсайа сүүстэн тахса спортсмен кыттара күүтүллэр. Эр дьон 60, 65, 70, 75, 20, 90, 105, 125 диэри уонна 125 киилэттэн үөһээ ыйааһыннарга күрэхтэһиэхтэрэ. Дьахталлар 55, 65, 75, 85 диэри уонна 85 киилэттэн үөһээ ыйааһыннарга киирсиэхтэрэ. Маны таһынан, аҕам саастаах эр дьон илин-кэлин түсүһүөхтэрэ.
Күрэхтэһии бырагыраамата:
Кулун тутар 14 күнүгэр —
10:00-13:00 – барыллаан киирсиилэр;
14:00-15:00 – үөрүүлээх арыллыы;
15:00-18:00 – барыллаан киирсиилэр.
Кулун тутар 15 күнүгэр —
10:00-13:00 – барыллаан киирсиилэр;
14:00-16:00 – финал иннинээҕи уонна финал киирсиилэрэ;
16:00-17:30 – муҥутуур кыайыылаах иһин киирсии;
17:30-18:00 – наҕараадалааһын.
СИА.
Хаартыска: ysia.ru саайтан.