Михаил Соров: «Анаалыстар түмүктэрин күүтэбит. Хонтуруол өссө кытаатта»
«Таатта улууһугар коронавирус дьаҥар хаптарбыт киһи тиийэ сылдьыбыт» диэн сурах бэҕэһээ ватсабынан тарҕанан, онто да суох, бу дьаҥтан саллан олорор дьоҥҥо, ыраас халлааҥҥа этиҥ эппитин тэҥэ буолла.
Бүгүн улуус баһылыга Михаил Соров маннык хоруйу биэрдэ:
—Эбийиэк бырайыагын куонкуруһугар кыайбыт тэрилтэ бэрэстэбиитэлэ Дьокуускайтан оҥоһуллан бэлэм буолбут бырайыагы манна, Ытык Күөлгэ, ыам ыйын 12 күнүгэр аҕалан туттарбыт. Дьаһалтаҕа бастакы этээскэ тутуунан дьарыктанар кэмитиэккэ бырайыагы хаалларбыт. Ол иннинэ, хаһаайыстыбаннай тэрилтэҕэ сылдьыбыт. Ол түмүгэр, ол киһини көрсөн докумуону быһаарсыбыт, туппут уонна хаһаайыстыбаннай тэрилтэҕэ кинини кытары хантаактаспыт үлэһиттэр, барыта 17 киһи обсерваторга киллэриллэн, анаалыстар ылыллан ыытыллыбыттара. Билигин түмүктэрин күүтэбит. Оттон улуус дьаһалтатыгар сылдьан мунньахтаабыт диэн суруйаллара онно суох диэн, биир дойдулаахтарбар тиэрдэбин.
Коронавирус дьаҥын бохсорго бары миэрэлэр тиһиктээхтик салҕаналлар. Бары нэһилиэктэр баһылыктарыгар нэһилиэнньэҕэ өйдөтөр, сүбэлиир, ирдэбили тутуһар үлэлэри өссө күүһүрдэллэригэр сорудахтар бэриллибиттэрэ. Элбэх кыбартыыралаах олорор дьиэлэргэ, ас-үөл атыылыыр маҕаһыыннарга, аптекаларга ирдэбиллэр кытааттылар, дезинфекциялыыр үлэлэр күүһүрдүлүннүлэр. Хонтуруол өссө кытаатта, — диэтэ Михаил Михайлович.
Сардаана Баснаева, «Саха сирэ» хаһыат, edersaas.ru